Kawlram Mipi Zuan Hnawh Dingah Zatlangbu Le Nu Hrin Covo Phu Fonh Zathum Nih UN Security Council Sin Ah Nawl

Myanmar Mipi Bawm Zok Ding In Zatlang Bu 300 Tluk Nih UN Ah Nawlnak An Tuah.UN Security Council nih tuah ding mi Myanmar ram kong innka khar khumh tonpumhnak tuah ding an timh cuahmah lio ah, ”UN Security Council nih Myanmar ram kong hi a biapi bik ah chia in Myanmar mipi hna a rannak in zawlrun ding ah nan i hmaithlak awk a si,” tiah Zatlang Bu le Minung Covo Phu 300 tluk nih cathanh chuah in nawlnak an tuah.

Chin, Kachin, Karen( Kayin) tel in Myanmar ram hrinfa phu dang hna le Amnesty International, Fortify Rights le Minung Covo kong ah ASEAN Parliament Member pawl an itelnak phu tel in, Phu 286 nih minsen an thut in an hal mi ah cun, “Myanmar ram chung ah Minung hawi zawnruahnak a zor tuk i Myanmar mizapi cu zawlrun an herh tuk caah tutan UN Security Council tonpumhnak ah Myanmar mizapi humzual a herh,” tiah UN Security Council cu an forhfial.

February 1 in Kawl ralkap nih uknak an laak hnu in tutiang ah kumkhat a tling deng cang i UN Security Council nih Innka kharkhumh in tonnak nan tuah mi le Statement nan chuah mi luklak hi rianhma a kal lo caah tuahsernak in nan langhter a hau cang, tiah Zatlang Bu pawl nihcun an cathanh ah an telh chih. Atutan UN Security Council tonnak ah, Myanmar ram kong ah UN Special Envoy Noeleen Heyzer le Combodia Foreign Minister Prak Sokhonn zong an kai lai, tiah theih a si.

Credit: The Chin Post

Author: Salai Ephraim