Kawlram Pi Caah Bawmh Kong Cu Pu Zo Tum Hmung Nih Mah Tinhin Fianternak A Vun Tuah Cang

US Nih Dohthlennak Caah Dollar Nuai 136 Renglo A Bawmh Lai Myanmar ram zaukphung (democracy) le federal ram sernak caah dohthlennak tuahtu hna cu US nih Dollar nuai 136 renglo a bawmh lai tiah theih a si.Hi bawmhnak pek ding kong hi kum 2023 chung US Cozah tangka ṭhenphawtnak upadi (Consolidated Appropriations Act of 2023) ah aa telmi a si i cu upadi cu Dec 29 ah President Biden nih fehternak min a thut cang.

Chin Association of Maryland (CAM) dirhtu le Excutive Director a simi Pu Zo Tum Hmung nih “US cozah tangka ṭhenphawtnak upadi cu President Biden nih min a thut cang i cu chungah Myanmar ram caah dollar nuai 136 re nglo bawmh ding timi aa tel. Kan i lawm taktak” tiah a chim.

Dollar nuai 136 cu dohthlennak caah a za mi a si lo nain zeimawzat cu thlennak a chuahpi lai tiah zumh a si. Hi US cozah i Consolidated Appropriations Act of 2023 cu Senate nih Dec 22 ah an cohlan i House of Representatives nih Dec 23 ah an cohlan ve. Cuticun President nih Dec 29 ah fehternak min a thut.Hi bawmhnak hi zeitikah dah pek a si lai ti cu a fiang rih lo nain tuan lei paoh ah a si ko lai tiah thiamsang hna nih an chim.

Credit: The Chin Post

 

Author: Salai Ephraim