Kawlram Tualchung Kan Dohthlennak Cu A Tlawm Bik Kum Kul A Rau Lai Ti Bak Pei A Si Hi

Myanmar Buainak Hi Kum 20 Tiang A Rau Kho, Tiah Singapore Ramleng Palai Nih A Chim: Ralkap nih Myanmar ram nawlngeihnak an lakmi hi ṭih a nun tuk caah kum 4 in kum 20 tiang a rau khomi a si, tiah Singapore ramleng palai Dr Vivian Balakrishnan nih a chim.Cambodia ram ah ASEAN chungtel ramleng palai pawl tonbiaruahnak an ngeih hnu ah Singapore ramleng palai Balakrishnan nih Myanmar kong a chimmi cu The Straits Times nih an ṭial.

ASEAN cung ah biakamnak a tuahmi vialte zong zeihmanh tuah loin a buar, tiah a chimchap.“Lungthiang tein chim ahcun nawlngeihnak an lakmi hi ṭih a nung tuk. Nawlngeihnak an lak in atu ah ramchung buainak a chuak. ASEAN cung ah a biahrennak caang 5 te zong a zul lo,” tiah Singapore ramdang Minister nih a chim.

Democracy a dirpitu Jimmy, Phyo Zeyar Thaw, Hla Myo Aung le Aung Thura Zaw thahnak kong ah SAC ralbawi cu ASEAN nih fakpi in a soisel hna. ASEAN chungtel ramleng palai pawl tonbiaruahnak a dih in cathanh an chuahmi ah cun, Myanmar kong ah kan lung a dong tuk hringhran cang, tiah an langhter. Cu cathanh an chuahmi he pehtlai in SAC nih kanmah kong ah i thlaknak nawl nan ngei lo, tiah an leh ve hna.

Credit: The Chin Post

Author: Salai Ephraim