Democracy uknak phung a tthat khunnak pakhat cu mipi nawlngeihnak (mass power) hi asi. Cu nawlngeihnak cu i thimnak (election) caan te ah mipi nih sullam ngei tein hman thiam aherh ve. Cozah ttha lo an kai tik ah ram a ttumchuk i, ram chungah buainak a chuak tawn. Cozah ttha an kai tikah ram a tthangcho i, ram chungah daihnak, himnak, le rualremnak a um tawn. Cucaah, a ra laimi 2020 thimnak hi sullam ngei tein kan miphun le ram caah asi khawhnak caah mipi le ramkhel party lei in i timhtuahnak ttha tein ngeih aherh hringhran ko.
Ramkhel Party lei in timhtuah aherhmi:Ram le miphun sersiamnak le tthanchonak caah a ttha bikmi tinhmui (Vision), tlaihtleng (Policy), le riantuan ding le ttuanning (Plan & Strategy) hna ttha tein an ngeih i, cu an ngeihmi cu mipi sinah fiang tein an chimrel (Campaign) khawh aherh.Party nih a ngeihmi vision, policy, manifesto a tthat tiang lawng a za lo. Thim ding ah tarmi minung pumpak (Candidate) hna kha mipi nih zumhmi le duhmi mittha an si aherh ve.Party nih teinak hmuhnak caah Party hruaitu upa chairman/president ( Prime Minister/ Chief Minister Candidate) hna cu miphun ca an i pekchanhnak (commitment & sacrifice), an nuncan ziaza (moral character), le thilti khawhnak (quality), le an tuanbia ( biography) nih mipi thinlung tam bik a lak tawn. Mipi nih zumhmi le uarmi (Politician) an si aherh taktak ve.
Teinak hmuh ruah ah a thiang lomi -pumpak, pengtlang, biaknak khat le khat le miphun karlak i huatnak le tlanglamhnak um loin politik thiang tein khel ding. Mipi vote tangkaa in cawk timh lo ding ( political code & ethnic) etc.. zulh aherh bak lai.Mipi lei in timhtuah aherhmi:Thimnak ah aa telmi ramkhel party hna nih ram le miphun caah an ngeihmi – Vision, Policy, Plan le Strategy hna ttha tein zohfel le theih aherh lai.Thimnak ah tarmi minung hna an sining zohfel dih aherh lai. Miphun caah zumh awktlakmi mittha hna nih cozah an tlaih i, mittha lo nih cozah an tlaih lonak caah minung thim thiam zong aherh tuk lai.Vote tlak tikah mah chungkhar, khrihfabu,pengtlang, le hawikom siinak zoh loin miphun caah a ttha bikmi party le minung kha thimfung pek ding asi lai.
Mah vote kha tangkaa in zuar bak lo ding asi lai. Tangkaa in zuar ahcun miphun zuar bantuk bak asi lai.A ra laimi 2020 thimnak boruak cuanh tik ah thil ningcang loin a kal lai phan a um ngai. Party nih an dirhmun fiang tein mipi sinah an langhter aherh. Mipi zong nih mah chungkhar le pengtlang ti bantuk ah dirhmun chia loin ram le miphun ca a ttha bik lai timi dirhmun cungah thimfung pek aherh hringhran ko. A biapi tukmi thimnak caan ah ram mipi nih ningcang loin thimfung thlaknak hi democracy uknak ttih a nun biknak zawn pakhat cu asi.Chinmi poh nih kan ram le miphun hi kan dawt cio dih ko lai. Ttha usih, tthangcho usih ti kan duh dih. Democracy kan hman (practice) kaa asi caah kan thiam lonak tampi a um ko lai. Asinain, asi khawh chungin kan ram le miphun tthatnak caah i zuam cio ko hna usih. 2020 thimnak caah timhnak ttha bik ngei ko hna usih.
Credit: Plato Van Rung Mang