Lai Bible A Hmangmi Nih Pathian Min Ai Awhtu Ah Khuazing Zingnu Kan Ti Awk A Si Loh

LAI BIBLE A HMANGMI NIH PATHIAN MIN CHIMNAK AH KHUAZING/ZINGNU TI HI KAN HMAN AWK A SI TI MAW? LAI HOLH IN BIBLE KAN NGEIH HLAN:Lai holhin Bible kan rak ngeih hlanah, Kan pupa hna nih, PATHIAN auhnak ah Khuazing, Zingnu tibantuk hi an rak hman ko lai. Rev. Van Hre nih thla a cam tikah, “Khuazing” tiah a rak ti tawn.LAI BIBLE KAN NGEIH HNU KHUAZING:


Lai holhin Bible kan ngeih tikah, kan Lai Bible nihcun, GOD, PATHIAN auhnak caah Khuazing a hmang ti lo i PATHIAN ti tu hi a hun hman cang. Khuazing ti hi voi 13 hrawng a hman i cucu miraang cun gods, pathian, zumlotu hna i an pathian chimnak tu ah khuazing biafang hi a hun hman cang hna. Moad khuazing ( 1 Siang 11:7 ) Milkom khuazing ( Zefaniah 1:5 ) khuazing Dagon ( 1 Sam 5:7 ), Ramdang khuazing ( 1 Sam 7:3 ) Chungkhar khuazing ( Zek 10:2 ) Vawlei khuazing ( 2 Korin 4:4 )

LAI BIBLE KAN NGEIH HNU ZINGNU:Lai Bible ah ” vancung khuazingnu” tihi voi 11 hrawng a hman i Jeremiah cauk chung ah voi 5 a hman. Jeremiah cauk chung i ” vancung khuazingnu” cu miraang nih the queen of heaven, mizo nih van lalnu, ti in kan hmuh. Israel mi hna nih BAWIPA PATHIAN sinin an pial tikah, hi vancung khuazingnu, van lalnu, the queen of heaven sinah hin raithawinak kha an rak khangh tawn ( Jer 44:17,18,19,25; Jer 7:18 ). Nihin Yangon hrawng zongah the queen of heaven/pathian nu/khuazingnu a biami cawnpiaknak diklo an um cang.

Cucaah, nihin Lai holh Bible aa tlaihmi hna caah kan PATHIAN, BAWIPA kan PATHIAN MIN chimnak le auhnak caah, Khuazing/khuazing le Zingnu/zingnu hi kan hman awk a si ti lo. Abraham PATHIAN, Isak PATHIAN le Jakob PATHIAN auhnak caah kan hman awk a si ti lo. BAWIPA JESUH auhnak hoi ahcun Zingnu/zingnu le bang cu a si a si kho lo. Hlan kan pupa hna nih BAWIPA kan PATHIAN le Van le vawlei kar uktu a si vemi thlarau hna kha thleidan an rak thiam rih lo. BAWIPA PATHIAN zong an rak țih, khuazing/zingnu hna zawng an rak țih biak hna i rai zong an rak thawi tawn! Lai holh tein Bible kan ngeih hnu cun, fel tein țhleidan piak kan si cang. Zapi nih kan hman ballo mi, zei huaha alo lo nain, ruah setmat tlak a si ko.BAWIPA nih Daihnak in pe ko hna seh.

Lamkaltu
Tluang Lian ( Martar)