Laimi kan hruhnak le chantiluan kan dawi khawh lonak aruang pakhatnak ka ttialmi “Vawlei cung hitlukin thisen in i chawnh khawhmi zawtnak a tam lio ah thisen check loin kan i tthitumhnak kong” ka ttialmi cu nan buai ko. Atu Laimi nih ram fimmi minung kan tluk khawh lonak aruang pahnihnak ka van ttial tthan. Cucu “Laimi nih nu le pa kan thleidan pengmi, nu hi pa nakin a niam deuh i kan hmuh pengmi hna” hi a si.
1.LAIMI NIH PA LAWNG RO KAN CO TERMI HNA HI KAN PALH;Pa lawng roco ter timi Laimi nih nunphung ah kan rak i ngeihmi a si. Laimi kan nunphung hi Laimi kan si caah kan duh ngaimi nunphung cu a si ko lai. laimi caah cun kan sia a rem ko lai. Asinain hi nunphung hna hi hlan lio pi/pu hna chan ca an rak cawn hlan, hruh lio chan i an rak ngeihmi, chan khat hnu chan khat, kan lawn termi an si i tuchan fim chan mit in kan zoh tik le Baibal mit in kan zoh tik ahcun kan Laimi nunphung hi a ttha lem lomi, Baibal he ai kalhmi, ram fim ah an hmanmi nunphung he ai ralchanhmi an tam ngaingai ve. Cucu kan hlawt hna a hau. Cun hna lakah pakhat cu Laimi nu le pa nih kan ngeihmi ro hi fapa le lawng kan peekmi hna hi a si. Laimi cu ka nule hi fapale bantukin, ai khat bakin, a dawmi miphun kan si. Fa nu le fapa a thleidang lomi kan si. Cucaah Laimi nu le pa nih fale caah kan ngeihmi ro vialte hi nu le pa ti um lo bakin ai zat veve bakin kan peek hna awk a si. Fanu le fapa kan thleidanmi thinlung le tuahsernak nihhin Laimi kan fimnak hi a tlam a tling rih lo timi hi a fian ter.
2.NU HI PA NAKIN A NIAM DEUH AH KAN CHIAH HNA;Innpumhnak kan tuah tik ah a ummi tthutdanh vialte ahcun nu cu an tthu ngam hrimhrim lo. Pa pohpoh cu tthutdanh ttha ah tthut ter an si i nu pohpoh cu ttuang ah tthut ter an si. Zeiruangahdah pa cu cungah an tthut i nu cu ttuang ah an tthut hlei? Araung kha tthatein ruat hmanh! Laimi nih pa cu nu nakin kan sang deuh timi lungput kan ngeih caah asi ko lo maw? Zeicadah pa cu nu nakin kan san deuh hlei?
3.KAN LAI PHUNGTHLUKBIA HI KAN THLAU A HERHMI AN UM;Kan Lai phungthluakbia ah “Nupi vua uh, darkhuang cum uh”, “Nu bia in bia kiak hlah seh”, “Nu bia hor ral a pet lo” timi te hna hi Laimi nu caah ngaihchiat pi awlk a tlak ngaingaimi phungthlukbia, nihin Khrihfa chan zongah kan i nunpi rihmi an si. Cucaah an vale a thi cangmi nu tampi cu an fanu le va neihnak kong chimrelnak hmanh ah i tel ngam lo in an um hna. Atu vawlei cung zoh usih law USA cozah zong nih UN i an ambassador can saupi an rak hmanmi cu nu a si ko. IMF President zong nu a si ko. Ram tampi cu nu nih an ukmi ram a si ko. Kan Lai phungthlukbia le nunphung ah nu hi pa nakin a niam deuhmi ah kan chiahmi hna hi thil hman le thil dik si selaw, ram dang zong nihhin an hman cio hna hnga.
4.LAIMI NIH NU NIAM DEUH I KAN RUAHMI HNA NIH LAIMI NU PAWL TTHANCHONAK A DAWNH;Laimi kan nunphung le kan tuahserrnak nih nu cu pa nakin a niam deuhmi i kan ruah hna caah Laimi nu tampi cu tthancho ning bantukin an tthangcho kho hna lo. (a) Nu nih pa hmai i biachim holhrel an i zahpi (b) An thinlungput a niam thai (c) Pa nih an kan sawisel sual lai ti an phang thai (d) Pa hmaiah an ral achia thai (e) Pa nih uk men dingmi ka si ko timi sin-um ruahnak kha an ngei i hruaitu sinak lungput kha an thlua (f) An vision a bi thai i (g) An caah tthanchonak lam a tlawm thai. Cucaah hruaitu si ai timmi Lai nu nakin mi kuttang i um ai timmi nu hi zaapi cu an si cang.
5.BAIBAL NIH A KAN CHIMHMI;Biakham hlun Israel mi hna hi Laimi bantukin male dominated society tang ah a tthangmi an rak si ve. Cucaah Biakam Hlun context in Baibal kan zoh tik ah nu cu pa nakin a niam deuh ah hmuh an fawi te. Asinain kan Baibal Biakam Thar kan zoh ahcun nu le pa kan i khahnak hi kan hmuh khawh. (a) Nu le pa cu Pathian nih amah he ai lo in ser veve mi kan si caah kan biapit ning ai khat (b) Khamhnak ah Pathian nih nu le pa cu ai lo veve bakin a kan khamhmi kan si caah kan i khat bak. (c) Pa cu inchungkhar i lu a si a ti caah nu cu inchungkhar ca i tampum asi hnag tinak a si. Lu le tampum cu a biapit ning ai khat bak. (d) Pathian rian zongah vawlei cung hmun zakip i kal i thawngttha va chim cu zumtu vialate Jesuh nih a kan fialmi a si caah nu he pa he a kan fial dihmi a si i kan i khat bak.
Gal.3: 27-29 ahcun ” Jesuh Khrih ahcun Judahmi le Gentile mi ti a um lo, sal le a luatmi ti a um ti lo, nu le pa zong a um ti lo” tiah a ti. Cucaah Laimi nih nu hi pa nakin a niam deuhmi ah kan chiah rihmi hna le mah nih hrim komi fanu le hmanh ro pakhat te hmanh pek awk thlak i kan chiah rih lomi nihhin Laimi kan nunphung cu Baibal he ai kalh i ram fim i a hmanmi nunphung le tuahsernak he zong ai kalh.Korin chung i “nu pawl cu pumhnak chung ahcun daitein um hna seh” a timi cu KJorin amah minung hna sining (context) in a chimmi a si. Ca cawng lo, mi holh tam tuk an si caah a si. Khakha Lai Tlang Khrihfa chungah luhpi awk a ttha lo. “Nu cu Pathian rianttuan dingah ka duh lo” Paul nih a timi zong khi fasem changmi an si caah a si. Jesuh thawhtthannak kong a chim hmasa biktu cu nu an si.
Credit:Aung Myint Thang