Laimi Khirhfa Hi Pathian Nih Khuaruahhar A Tuahmi Zeidah A Si Ti Kan Fianglo

Laimi Khriha tampi nihhin Pathian khuaruahharnak tuahmi hi zeidah a si ti hi kan thei fiang lo.Pathian khuaruahharnak i a fa bikmi hna hi a ngan bikmi ah kan ruah tawn.

1.HRIN TTHAN NAK;Pathian khuaruahhartuahmi (miracle) ah a ngan bikmi cu hell a tla dingmi minung pakhat nih Jesuh Khrih a cohlan i khamhnak a comi hi a si. Zungzal a mit lomi hell i a kal lio mi nih vancung lam lei tu i ai mer i, Sehtan sal chungin luatnak a hmuh i, Khrih roco pitu i ai canmi hi a si. Misualmi Pathian fa i an i can tiang kan cawnpiak khawhmi nakin a ngan deuhmi thluachuah le Pathian khuaruahhar tuahnak adang a um TI lo. Pathian zong niha lawmh bikmi a si.

 

2.KAN SUAL KAN I CHIRMI;Pathian nih kan cung i a tuahmi khuaruahharnak le kan comi thluachuah ah a ngan bik pahnihnak cu sualnak kan tuah i kan i chirmi hi a si. Sualchir timi cu tuah ti lo kha a si. Sualnak tuah caan poh i a poi tuk ti i tuah tthan lengmang kha a si lo. Zumlotu hna nihcun mi an hlen zong an i chir lai lo, thil an fir zong an i chir lai lo, lih an chim zong an i chir lai lo. Thil tthalomi kan thuah sualmi cungah ichirnak kan ngeih i tuah duh ti lo i kan ummi, sual huatnak kan ngeihmi hi Pathian thil khuaruahhar tuahnak thawng in a si.

 

3.KHRIH CA I TEMTUARNAK;Jesuh na zumh ruang le a rian thiang feltein na ttuan ruang i na cung i mithli thlaknak a chuah cu Pathian nih an dawt caah a si. Pathian nih na cungah thil khuaruahhar a tuah caah a si. Marry nih Jesuh a pawi i, nganfahnak a tuar i, a cawmken cu a cungah Pathian nih thil khuaruahhar a tuah caah a si.

 

4.ZUMTU PAKHAT NA SIMI;Vawlei cung i biaknak phuan relcawklo lak i a nungmi Pathian zumtu na si hi khuaruahhar thil pakhat zong a si i na ca le ka caah thluachuah lianngan bik lakah pakhat zong a si. Cu thawng cun sertu le liannganbik Pathian cu ka Pa ah ai cang i kannih cu a fale kan si. A Thiang Thlarau in a kan umpi i Pathian nih a thawnnak in umpi mi kan si. Supermen le superwomen ah kan i cang. Ahohmanh nih tei khawh lomi, tuah khawh lomi zeihmanh a ngei lomi ah kan i cang.

 

5.THLACAM NUN KAN NGEIHMI;Pathian khuaruahhar tuahmi lakah a ngan taktakmi pakhat cu Pathian kan thangtthatmi le Pathian sin i thla kan cammi hi a si. Kan herhmi vialte cu Pathian cu thlacamnak in kan chimh i Pathian nihcun a kan ngaih piak. Zeibantuk duhherh kan ngeih tik poh i Pathian kan hal i Pathian nih a kan peekmi hi khuaruahhar taktak cu a si.

 

6.DAWTNAK KAN NGEIHMI;Minung cu kan sining ah mah zawn lawng ai ruatmi kan si. Asinain mi cungah dawtnak kan van ngeih i mi zawn kan van ruah khawhmi hi Pathian nih kan nunnak ah thil khuaruahhar a tuahmi pakhat cu a si. Pathian dawtnak nih a umpi lomi hna cu u le nau hmanh ai daw lo mi an tam pi.

 

7.THIL DANG KHUARUAHHARNAK HNA;Thil dang khuaruahharnak hna zonghi pathian nih kan cungah a tuahmi an tampi ko. Zawtdamternak tehna zong hi Pathian khuaruahhar thiltikhawhnak an si ve ko nain acunglei bantukin an lianngan lo. Zawtnak phun tampi cu sibawite zongnih an damh khawhmi tampi an um. Mithi thawhter timi zonghi khuaruahhar lianngan a si lo. Na thlacamnakin zumtu pakhat a thimi kha tho tthan selaw, a thin a hang hnga. “Ziah vancung i a kai cangmi, vawlei ah rak kir tthan ding in thla na cam” an ti hnga. Cu a tho tthanmi pa kha ni khat cu a thi tthan te lai i voi hnih thih in a thi hnga i hna a hnok chinchin hnga.

 

Baibal i a umlomi nan tuah i khuaruahharnak i nan ruahmi tampi cu Pathian tuahmi khuaruahharnak an si lo. Thlacam i mi tluk ter tehna, thlarau rit i mahhngallo i um tehna, diddededada ti i mihmai i hlasak i mipi laam le kui ter tehna cu zeihmanh khuaruahhar dinga um lo. Mi nih thla an in camh tik i na tluk lo zongah a poi nak a um lo. Na tluk thawng zong in zei na sinak hlei lai lo.Pathian bia, Baibal, ning tein a kalmi hi Thiang Thlarau in a khatmi cu an si.

Credit: Aung Myint Thang

Author: Salai Ephraim