Caan tha timi hi voikhat lawng hmuh khawh a si.Atulio kawlrampi Hluttaw lutlai nawl neitu hna cu tlangcung mi lawngte an si. Pyitaungsu hluttaw Nazaka le pyituh hluttaw chairman cu U Ti Khun Myat Kachin Pyitaungsu hluttaw duh Nazaka le Amyotha hluttaw Chairman cu U Man Win Khain Than Karen, Pyituh hluttaw vice chairman cu U Thun Thun Hein le Amyotha hluttaw vice chairman cu U Aye Thar Aung Rakhain ti in tlangcungmi lawngte nih an uk i an hruai.
Upadi remhnak kong caih nak ahcun tlangcung mi kan kut ah a um lio a si. Hi lio caan bak ah tlangcung mi nih kan herh bik mi federal muru pakhat zong a si mi 2008 phunghram pohmah 261 Vuancichoh thimnak upadi, Vuancichoh cu cunglei in tamada nih khanh ti loin an mah tein thim nak pek ding in upadi remh ding cu “Lungthli ruah lo, vok ke” ti bang USDP MP hna le Ralkap MP hna nih phungning tein hluttaw ah an vun chuahpi.
Cu lio ah NLD MP nih uk mi hluttaw pi nih a kong tampi chirhchan in an cohlang lo. Hi lio ah pyitaungsu hluttaw chung nawlnei bik biakhiah kho tu a lutlai vialte cu a cunglei ka langhter bang tlangcung mi lawng te an si. An mah kut ah pohmah 261 remh ding cohlan duh le duh lo a um mi a si. Kachin, Karen, Shan, Rakhain miphun hna cu federal a khel hmasa miphun an si kum (60) renglo hriam a tlai cang mi an si, mi tampi nih nun nak an pek cang.
Cu lio ah an kut chung ah nawlneih nak a um, tlangcung mi kan khel mi federal muru a um ko micu NLD party siruang i an cohlan duh lo le an tlawlh ko micu a poi hringhran ko. Kawl party sio rawl tarh ei hnu ahcun an hnuh nak poah ah an kal cang i mah miphun khel mi federal hnulei an chit riangmang mi hmuh tik ah lung a fak i ngaih a chia hringhran ko. NLD zong nih tlangmi federal pek an duh le duh lo fiang tein hmuh khawh a si.Party ciocio, vuanci ciocio, MP ciocio kan i khat lo kan ti micu hi bantuk ah a hung lang tawn.
Credit: Lal Maung Cung Cinzah