Lih Lawngte In A khatmi CDF Thantlang Cathanh Zohfelnak

Saya Vabielo a thih hnu ni 5 ah cathanh an vun chuah, mipi nih pressure peknak hmual a ngeih ning a vun lang. An kherhhlai cuahmah rih caah a phi taktak cu hngak ta rih ko u sih.’Kan tlaih lio ah hliamhma a tuar cang’ Mah hi an cathanh ah an fehtermi cangmi a si. An chim duhmi cu ‘kanmah nih kan tukvelhmi a si lo, kanmah tukvelhnak in a thimi a si lo, midang kut in hliamhma a tuar cang’ an ti duhnak khi a si.Saya Vabielo a takpum, a lu le a kut i hliamhma hna khi zoh tikah hliamhma a tuarnak hmun in a tho kho ding le a kal kho ding a si bak lo, saikel a mawng kho ding zong a si bak lo timi 100% a fiang.zeitindah CDF ralkap sin a phak khawh lai? Khitluk hliamhma tuar buin.Hliamhma a tuar hnu in saikel hmanh mawng kho sual ko hmanh sehlaw a thihnak hnga lo siizung a umnak Hakha ah a kir hnga. Thantlang lei a lanhnak ding sullam a um lo.

Khitluk minung taksa nih a celh lo ding tiang in hliamhma a tuar ko buin CDF-TT ralkap nih siizung kalpi colh loin maw a phone an check i CDM a tuah le tuah lo tiang an hal khawh ko hnga. Hliamhma tuar cia in an tlaih ahcun holh hmanh a holh kho lai lo, zeitindah khitluk hliamhma khi a celh hnga?Sakhan ah a hliamhma he zaan khat kan riahter an ti rih hoi. Khitluk a hliamhma he minute pakhat hmanh ai-hram loin ai hngilh kho hnga maw? An tlaih lio ah khitluk a hliamhma khi an hmu hgna lo maw? A tlaitu CDF-TT ralkap cu an mit maw a caw hnga? Silole an sakhan ah maw amah tein hliamhma cu a rak um chom hnga?Anih hi CDM a tuah rih lomi a si caah Kawl ralkap nih an velh lai timi zumh a um tuk lo.

A tlaitu CDF-TT ralkap nih an chimnak ah Saya Vabielo a phone ah ‘Kawl ralkap an i telnak hmanthlak kan hmuh’ an ti. Mah hmanthlak cu a riantuannak zung ah Kawl ralkap an rat lio a thlakmi hmanthlak a si tiah ka theih.Mara lei cu Surkhua in kal a si, zeiruang ah Thantlang lei in kal ai timh? tiah a tlaitu CDF ralkap pakhat tiah zumhmi nih comment ah a tial bal. Saya Vabielo cu February ah a nupi he CDM an rak tuah nain amah hi zung a kai than tiah a comment ah a tial chih.‘dalan’ tiah an lunghrinh pah ko timi cu a fiang, an cathanh zong ah i fian khawh asi.

An tlaih lio ah saikel in a ra kho ko, bia an halmi zong tha tein a let khawh ko hna. a semnak a khua Sabawngpi an phakpi hnu lawng ah maw khitluk hliamhma khi a ngah chom hnga?Khitluk a hliamhma hmuh ko buin ‘ka tang a fak a ti i ai dinhnak ah a thi’ tiah chim cu lih champion pek nan hau.Ngakchia lente ai celhmi kan lo ko ee. Hi luklak in mipi hlen timh cu a poi ko. I hlen awk a si lo, i pheh awk a si lo. Palhnak cohlan in ngaihthiam i hal caan a si, i ngaihthiam caan a si.

 

Credit:Salai Lungthli Tum

Author: Salai Ephraim