Malaysia ah ralzam dirhmun in khua a sami Pu Tluang Za Uk ( Hakha ) cu a tu hi Malaysia UKM sizung ICU room ah lungfim loin a um ko. Sizung a umnak ah tangka tamtuk a dih ding a si cang. Cu ruangah vawlei cung ramkip le hmun kip ah a ummi hna nih Pathian nih thluachuah an pekmi chung in na siantawk tein Pu Tluang Za Uk caah na rak samh kho ve hnga maw tiah zangfak kan in nawl hna.
Pu Tlaung Za Uk cu July 31, 2019 zan ah khan innleng step hlei ah a lum, a ril i a lu ah hliam a tuar. Clinic ah ai piah i cuticun ni tam ngai a um. Cu hnu ah Clinic a um lio ah lungfim loin a um i a rannak in August 6, 2019 zanlei ah khan UKM sizung ah kalpi a si. August 7, 2019 zing ah khan operation an tuah. A thluak ah thi a lut tiah sibawi te nih an chim.
A nupi nih a chimnak ahcun ” A dam kho ding a si ko. A dam tik zong ah lungfim tein a um kho ding khi a si ko. Tang ka belte tamtuk a dih lai tiah an kan ti” tiah a chim. A nupi a lungrethei tuk. August 7 zingah operation an tuah i August 10 ah khan CYO sizung i kan va kal ah bill RM – 19000 a tla cang tiah an ti hna. A tu hi a umnak sau tuk cang i a tam tuk cang lai.
August 6 in a tu ca ka tial August 22 tiang hi UKM sizung ICU room ahcun lungfim loin oxygen an pek chom hi a um ko. A nupi zong a lung a dong ngai cang. Kan hnu lei te August 20 ah khan a hrom operation an tuah hoi.Sizung ahhin ramdang mi kan si ruangah le tangka an liam kho lai ti an kan ruah caah hin tha tein an kan thlop duh lomi ah khin kan ruah cang. An mah nih tangka ngeih mi an ngei fawn lo.
Lungrethei taktak khi si ko. Cu caah cun vawlei hmunkip ah a ummi kan miphun hna nih nan mah le ti khawh tawk cio in nan kut rak samh cio hram uh. Khrihfabu in siseh, pumpak le pengtlang zong in rak bawm hram cio uh tiah zangfah kan in nawl ko hna.Pu Tlaung Za Uk cu Malaysia, Lokeyew sang ah a nupi Zung Tha Sung ( Zokhua ) le fapa pakhat he khuasami a si.
Minung kan nunnak cu Pathian kut ah a ummi kan si bang in Pathian sin ah thlaza rak campiak cio hram uh. Bawmhh nak pek na duh ahcun: Ph: 0105697881 ( Andrew Tum Tling ) ka facebook zong in cakuat khawh peng ka si. Malaysia CYO upa dangdang sin zong bawmhnak pek khawh peng a si.
Credit: Andrew Tum Tling (CYO Malaysia)