Mandalay Peng Tlanglawng Rian Tuan CDM A Tuahtu Hna Caah Thawngpang Chia Ngai A Si

Mandalay ramthen Myintnge khua in CDM a tuahmi tlanglawng riantuan 1000 leng cu an rian in phuah an si tiah sehzung manager nih a thanh.Cathanh nih a langhter ningah rian phuahnak kong he lungtlinglo nak an ngeih a si ahcun thla 6 chungah zungah nawl (appeal) tuah khawh a si.Mah chungah NLD cozah nih a karh umlo in cawih mi thla 2 hlawh zong pek than ding a si. An pek lo ahcun tazacuai an si lai tiah a tial.

Rian in phuah mi chungah ralhrangbu nih an tlaih cang mi bawi 1 le riantuan 10 telin 1117 le ni hlawh in riantuanmi 29 an i tel. Sehzung ah rian pakhat hmanh a kal khawh ti lo ruangah caan saupi hnuah ca an chuah mi a si.CDM a tuah i rian ah a lut than mi hna kong cu zeihmanh chim ka duh lo.Fiangte chim ahcun Myintnge CDM cu kan hlawh a tling tiah rian in phuah ve mi Myintnge tlanglawng sehzung riantuan pakhat nih a chim.

Myintnge tlanglawng sehzung ah a hmun i riantuan le nihlawh riantuan 1684 an um i, April thla tiangah CDM a tuah mi 1500 an um nain, a hnuah sining dangdang ruangah rian a lut than mi zei mawzat an um.Atu bantukin riantuan dihlak tluk CDM an luh ruangah ralhrangbu nih CDM bawmchantu hna an tlaihnak ah bawi 1 le bawmhnak thilri zong an tlaih.

Tlanglawng riantuan hna nih an bawi thlah piak ding le an thilri pek than dingin an hal ruangah ralhrangbu nih an kah hna i minung 5 an nunnak a liam, riantuan 11 tel in 43 an tlaih hna.CDM a tuah mi tlanglawng riantuan hna ruangah tlanglawng service zong tampi kalpi khawh a si ti lo nain riantuantu hna hi riandang a har caah an khuasak a har ngai tiah theih a si.

Source: Irrawaddy ( TCP )