Min Aung Hlaing Nih Kahdohnak Kan Ngol A Ti Mi Cu CNF Nih Leh Nak An Tuah

Min Aung Hlaing nih thla 5 chung kahdohnak kan ngol a ti mi cu zumhtlak a si lo caah kan lamthluan kan peh rih ko lai: CNF Spokesman Salai Htet Ni.September 30 SAC phu lutlai Min Aung Hlaing nih thla 5 chung (2021 October 1 in 2022 February 28 tiang) kahdohnak kan ngol, tiah a thanh mi cu zumhtlak bia a si lo caah kanmah le kan lamthluan kan peh rih ko lai, tiah CNF in Chimphuannak Nawlngeitu Salai Htet Ni nih a chim.

Min Aung Hlaing le a tlangpi hna nih an thanh ning ah, “Thla 5 chung hi Ukhruainak, Runvennak le Cozah a hnursuang mi dah ti lo cu kahdohnak kan ngol,” tiah September 27 ah an rak thanh.”Hihi vawleipi hmai le mithmuh ah thiamco a duh ve sawhsawh. Hriamtlai pawl nih an kan kah ruang ah kan kah ve mi hna a si, ti lei in mersan a duh.

An riantuannak a hnursuang lo mi asiloah kahdohnak a umlonak hmun poh ah kahdohnak kan ngol, an ti sawhsawh mi a si. Zeihmanh aa hlei lo. Cucaah, kanmah le kan lamthluan cu kan peh peng ko lai,” tiah Salai Htet Ni nih The Hakha Times ah a chim.

“Kahdohnak kan ngol,” ti mi hi 2018 December 21 in nihin tiang ah voi 20 an thanh cang nain Tlangcung hriamtlai hna sin ahcun kahdohnak a fak chinchin.Hi bantuk hin nawlngeihnak an lak hlanpi in kahdohnak kan ngol, tiah an rak thanh lengmang nain kahnak a fak chinchin i CNF/CNA dirhmun in kan pehzulh rih ko lai, tiah a cunglei upa nih atu bantuk in a fianter hi a si.

Credit: The Hakha Times

Author: Salai Ephraim