Min Aung Hlaing Nih Zarh Hnih Chungah Chinram Kulh Cu Kan Thenh Dih Lai A Ti

Moe Nyin ah ralhrang nih Jet Vanlawng pahnih in bomb an thlak: Kahcin ramkulh, Moe Nyin peng Mai Naung khua pawngah Oct 9, tuni zinglei suimilam 9 hrawngah khan ralhrang nih Jet vanlawng pahnih in bomb voi 4 nak tlawmlo an thlah tiah theih a si.Mai Naung khuami pakhat nih “Khua in nitlak lei kap ah a si. Jet vanlawng pahnih nih bomb an thlak len. Khua in a thawng a thang taktak. An thlaknak hmun hi a zawn ciah kan thei lo. KIA le PDF an um ti an ruah ruangah an thlakmi a si” tiah a chim.Ralhrang nih tuni bomb an thlaknak lei ahhin voikhat hmanh kahdohnak a um rih lo, tutan bomb an thlak hi a voikhatnak a si. Hi hmun hi KIA Brigade 9 tang battalion 26 an umnak a si tiah Kachin News Group nih a tial.

Chin ramkulh a kaimi ralhrang hna nih Hing Zing khua ah vok le thilri dang an lakpiak hna: Oct 9, tuzing ah Chin ramkulh lei a kaimi ralhrang hna nih Kalay-Hakha lampi ah a ummi Tidim peng Hing Zing khua inn cheukhat ah an lut i Computer, thing-ahnak seh, belkheng le facang zeimawzat an lak. Cu pinah vok pakhat zong an thah i a pum in an phorh tiah theih a si.Tuzing suimilam 6 hrawngah ralhrang mawtaw 14 le tank 2 hna cu Chin ramkulh Tidim lei ah an kai i chun suimilam 12 hrawngah ralhrang mawtaw 3 a kai than tiah theih a si. Chin ramkulh lei a kaimi ralhrang hna cu mipi vengtu ralkap hna nih lampi ah an bawh hna i an kah hna tiah Lai media tampi nih an tial nain tuanvo ngeitu hna nih thanhmi a um rih lo tiah Zalen nih a tial.

Myiang peng Kyauk Yit Palek Sakhan PDF nih an kah, ralhrang a thimi an tam: Sagaing ramthen, Myiang peng Kyauk Yit palek sakhan cu Oct 9, tuni zinglei suimilam 5 ah MSPDF, 27 Revolution Forces, Hnalung Hlah Luhmet Ci Mia Aphoih နှလုံးလှလူမိုက်ကြီးများအဖွဲ့ le Taloh PDF hna i bawm in an kah tiah theih a si.Kyauk Yit palek an kah lioah palek bawmh dingin a rami ralhrang mawtaw pahnih cu mipi vengtu ralkap nih lampi ah bomb an puahhnawh i mawtaw cu a pahnih in aa let. Mawtaw cungah a ummi ralhrang tam ngai an thi tiah theih a si.Ralhrang lei a thimi zat hi fiangin theih a si rih lo nain an tam ngai ti cu a fiang. Ralrhang a thimi ruak hna cu tuni zanlei 3:15 ah ralhrang dang nih an rak lak hna tiah Khet Thit Media nih a tial.

Matupi le Mindat ah Phone le Internet Line An Phih Dih Cang: Chin ramkulh Matupi le Mindat peng ah Oct 8, nizan thok khan phone line le internet line an phih dih cang tiah theih a si.Nizan tih ni tiangah Matupi pengah Mytel Wifi hman khawh rih a si nain atu cu hman khawh a si ti lo. Mindat peng zongah 2G internet line lawng a ngah cang tiah theih a si.Ralhrang nih Chin ramkulh, Magway ramthen le Sagiang ramthen hna cu Oct 9 thok in zarhhnih chungah kan thianh dih lai timi thawng a um hnuin phone le internet line an phihmi hi a si tiah khuami hna nih an chim.

Matupi khuami pakhat nih “Matupi lei phone kan chawnh len zongah a ngah lo. Hmasa ah Telenor lawng a ngah lo, phone dang cu a ngah dih ko. Atu cu phone line dihlak an phih cang. Kalay le Gangaw lei in Chin ramkulh ah ralhrang mawtaw le tank an kai ti kan theih tikah kan lungre a thei tuk” tiah a chim.Ralhrang nih Chin ramkulh, Magway le Sagaing ramthen hna cu Oct 9 thok in zarhnih chungah kan thianh dih lai tiah timhtuahnak an ngei cang bantukin Chin ramkulh zongah an thazaang an chap chin lengmang tiah Mizzima News nih a tial.

By. Salai CP Lian ( TCP )

Author: Salai Ephraim