Mindat Mipi Caah UNHCR Nih Bawmhnak A Pek Mi Cu Phungkyi Rocotu An Si Cang Ne

UNHCR Nih Mindat Ah Duhning In Bawmhnak An Pe Kho Lo Mindat peng chung ralzaam hna bawmh dingin UNHCR hna cu July 19 ah Mindat an phan cang nain an duhningin an umkal khawh lo ruangah an tlung cang tiah Mindat khuami nih an chim.

UNHCR riantuan hna nih an i timh ningin Mindat peng lenglei ralzaam hmun le khua hna ah an kal khawh lo ruangah bawmhnak thilri hna cu Mindat khuachungah a um mi phungki inn ah chiahtakin an tluntak hi a si.UNHCR riantuan hna an phanh a thaizing ah Mindat ah ralhrangbu le CDF-Mindat kar i kahnak a chuah ruangah ralhrangbu nih caan tha lakin umkal an khap mi hi a si.

UNHCR nih bawmhnak hi inn dawng 500 caah an rak phorh nain, phungki inn le biakinn ah a um mi inn dawng 66 sin lawngah an pek khawh hna.Mah caah a tang mi inn dawng 434 bawmhnak hi Tongpulu phungki inn ah an chiahtaak hna i, ralzaam hna an rak kir than te tikah i lak te dingin an ti hna.

Hi kong he pehtlaih in Mindat khuanu khuapa pakhat nih “kanmah nihcun ramtangah a um lio mi ralzaam hna vialte nih co dih hna seh ti kan duh mi a si nain va phawtzamh khawh a si lo tikah kan lung a tha lo ngai” tiah a chim.Mindat pengah ralhrangbu le CDF-Mindat kar i kahnak ruangah ralzaam hmun le khua dang dang ah a zaam mi 6000 leng an um.Mah hna caah ei-din le sii lei bawmhnak an herh ngai tiah theih a si.

Ref; BAP