Mindat Peng Mipi Hna Ruahsur Lak Le Ti Lian Lak Ah Zaang An Fak Ko Mu

Kahdohnak Ruang ah Mindat Peng Khuami pawl an Zaam Chap Hna.Mindat peng chung kahdohnak ruang ah khuate khuasa pawl nih nikhua chai le ruahsur lak ah an innlo an zaamtak tthan hna.Nihin zaanlei sml. 4:30 hrawng zong ah Mindat-Matupi karlak meng 60 zawn ah kahdohnak a um.

Ṭaal Khua ah SAC Ralhrang nih Ting 150 Man Thilri an Fir/Hrawh.Falam peng, Ṭaal khua ah SAC ralhrang pawl an lut i khuachung thilri tampi an hrawh pin ah thil an firmi zong a tam ngaingai, tiah thawng kan theih.July 20 ah SAC ralhrang pawl cu Ṭaal khua pawng ah an phan nain i kahnak ruang ah ni hnih le zaan hnih Taal khuachung lut kho loin an um.


July 22 zinglei ah Ṭaal khuachung ah an rak lut i, khuachung inn 26 lak ah inn 21 hi an bauh hna i thilri an fir, an hrawh hna.“TV pakhat, Phone pali, thilpuan i hruk khawhmi tampi, puan zun tampi, facang, chiti le ar 50 hrawng an fir pin ah thawhlawm tangka zong an lak,” tiah khuami nih an chim.


Khuachung dawr pakhat an bauh i thilri an lakmi hi a man in tuak ah cun ting 15 MMK man hrawng a si.Thilri an firmi le an hrawhmi dihlak tuak ah cun azapi ah ting 150 MMK man a si lai, tiah an ruahdamh.An duhduh in khuachung ah thilri an fir hnu chun sml. 12:00 hrawng ah Taal khuachung in an chuak tthan hna.

SAC ralhrang pawl Ṭaal khua an phak lio ah hin khuami an zaam dih cang caah ahohmanh tlaihkhih a tongmi an um lo.CNDF le SAC ralhrang kahdohnak a chuah ruang ah Ṭaal, Tlangzar, Thlanrawn le Rialti in khuami 800 hrawng an zaam hna i atu ah cun mi tam u an khua ah an kir tthan cang hna, tiah kan theih.

Credit: The Chin Journal