Minung kan nunnak ah hin taksa nunnak le thlarau nunnak tiin nun phun hnih a um

Minung kan nunnak ah hin taksa nunnak le thlarau nunnak tiin nun phun hnih a um. Taksa nunnak hi cu a chan a tawi te. Bible nih kum 70/80 a si a kan ti. Thlarau nun bel te zungzal in zungzal a si.

Cuticun, kan nunnak ah hin rawl phun hnih a um. Cucu taksa rawl le thlarau rawl an si. Kan taksa nih ni fate in rawl ei a herh. Kan thlarau zong nih ni fate in thlarau rawl ei a herh.

Mi tampi nih kum 70/80 lawng a chan a si mi kan taksa rawl caah fak piin rian kan ṭuan. Asinain zungzal in a nung dingmi kan thlarau caah cun kan ṭuan ti lo. Kan taksa cu ni fate in rawl thawthaw kan pek nain kan thlarau tu cu rawl kan pe ti lo.

Joseph nih ngeihpi kum 7 chungah heh tiah rawl a khon. Cu a khonmi cu hmailei i a ra dingmi mangṭam kum 7 caah khan a si. Ngeihpi kum 7 chung ah rawl a rak khonmi vialte kha mangṭam i an nunnak a rak si.

Atu kan nun lio, kan dam lio, caan ṭha kan ngeih lio le caan ṭha kan hmuhmi hna hi zungzal nunnak ro khonnak le thil ṭha tuahnak le Bawipa caah hman thiam hi a biapi tuk hringhran. Atu lio caan hi kan caah caan ṭha bik a si. Atu i kan tuahmi thil ṭha vialte le Bawipa caah le khrihfabu caah kan ṭuanmi, tuahmi vialte hna hi hmailei Bawipa sin kan phak tikah kan laksawng lawng te an si dih te lai.

Credit:Abraham Ram Lian Khar

Author: Salai Ephraim