Mitthli Hmual: Siasal Nakin A Biatu Ttihnung Deuh

George Muller nih a dirhmi ngakttah sianginn ah nupa ngei lo pa te cu an chiah ve. Nu cingcih lo le pa muangmuah lo hrat, an sianginn dingrep a zul kho lo. Avoi a tam cang caah sianginn in chuah ding dirhmun a phan. A donghnak ah George Muller sin ah an kalpi. Muller cu a ngaih a chia tuk. A cawnpiak nain zei ttankai dawh a si ti lo. Zeiti ttha, na hmailei lam tluannak ca tal ah thla kan campiak ta lai mu a ti. Thlacam cu a van thok. Hngakchia pa cu mi lungkhong tuk cu si kaw, a mit zong aa chinh duh lo. Hngakchia pa a dawt tuknak thinlung nih Muller cu mitthli he a ciahter. Thla a campah ah cun dawnh cawk lo in a mitthli an hung luang. Mit aa chinh duh lomi ngakttah pa nih Muller mitthli rial bang zuur thluahmah a tlak cu a hmuh. A nun nih a celh ve rua lo. Rai hrang thirh in a thirh. Aa hngalh loin a hung ik thluahmah. Muller nih Amen a van tuah ahcun ngamh khawh ti lo in a ttap. Na ka ngaithiam kho hnga maw a ti. Muller mithli nih a hak tukmi thinlung a khuai, zungzal ca in a nun a thlen.

 

Muller cu amah miaknak le rumnak caah ngakttah a zohkhenh lo. Ngakttah nun tthatnak liauliau lawng kha aa tinhmi a si. A haak a kau lo. Haakkauh lo hi mi caah mitthli tlak khawhnak a si. Biadang in chim ahcun, haakkauhnak nih mi dang caah mitthli a tlakter kho tawn lo. Muller cu ngakttah a sing leng in a zohkhenhtu a rak si. Amah phaisa £81, 490 a hman. A thih ahhin £169 lawng a taantak. A phaisa fang cun £60 lawng a si, £100 hi thilri cauk le tthutdan tb,a si.

 

Tuluk ram pengtu, Chi’n Shih Huang-ti chan ahhin ral ttih ah ralhruang-vampang (atu i Great Wall hi) sak a rak timh. Vanchiat ah an lungrualmi rak cim lengmang kaw aa timhmi tlamtlinh khawh dawh in a rak um lo. A ram mifim le zungthiam vialte a kawh hna. Zeitindah kan ralhruang kan lim khawh lai ti cu a rak hal hna. A mifim hna nih cun, “Ralhruang hi khan 1000 a sau ding a si. Cucaah khan 1 ah minung pakhat lengmang in minung 1000 kan phum hna ahcun, kan limkhawh ko lai. Minung 1000 hmuh bel cu a har tuk hnga dek maw?” an rak ti. Siangpahrang pa nih cun, “Har hlah! Ka caah minung cu thing le ram tlukceu pei an si ko a ti hna. Mifim pakhat nih hitihin ruahnak a vun chuah. Kan holh ah WAN tihi sang khat tinak a si. Cucaah WAN timi pa kan hmuh ahcun amah pakhat cu a za ko lai a ti. Leengnu Meng he aa tthi um kaa WAN cu an inn ciacia ah a ban thlarang in an va dawh i ralhruang-vanpang ah cun an rual chih. A dawt bikmi Nu Meng nih cun a pasal WAN ruak cu a hung kawl. A hmuhkhawh ti lo caah Vampang cu aa tlaih i ngui-ngui-thlak in a ttap. A mithli tamtuk lawmmam a tlak caah an sak cuahmahmi ralhruang-vanpang pi nih a celh ti lo i a cim phut. Dawtnak mithli cu a hmual a fak tuk, lungrual zong nih a celh lo; a chimh khawh ko.

 

Minung nunnak le thingram tlukceu ah a chiatu, uktu misual Chi’n Shih Huang-ti lungput, sualnak ngei lo WAN a chanlai ah an thahmi nunnak le Lady Meng dawtnak mithli hmual hna komhchih in C.S. Song nih, “The Tears of Lady Meng: A parable of people’s political theology” timi cauk a ttial. Minung sinak hmelchunhnak pakhat cu mitthli tlak khawh le mi mithli hmuh khawh hi a si. Siasal kan timi Milem khi mithli a ngei lo. Mi mitthli zong a hmu kho lo. Cucaah siasal kan timi milem nak khin a biatu minung hi ttih a nung deuhmi cu kan si.

Minung cu mithli kan ngei, nain haakkauhnak nih kan mithli a tlakter kho tawn lo. Kan haakkauhnak nih midang mitthli tu a tlakter tawn. Midang mitthli a tlami hmanh cu haakkauhnak nih a kan phenh i kan hmuhpiak kho tawn hna lo. “Haakkauhnak hi siasal biakning phun khat a si (Kolose 3:5),” tiah bible nih a kan cawnpiak. Haakkauhnak nih thil tam tuk a hrawh. Haakkauhnak kha siasal ah naa ser sual ahcun, nangmah kha midang caah ttih nung na si ko lai. Mi bawmh duhnak na ngei ti lai lo. Mi zawn ruahnak na ngeihmi a lo lai. A donghnak ahcun nangmah miaknak caah mi an mitthli tlak zong a poi ah na chia lai lo. Mi nunnak a liam hmanh ah na caah hlawknak a si ahcun a phu ko na ti lai. Cucaah minung cu mitthli a ngeimi kan si; mitthli a tla khomi le mi mitthli a hmu khotu si ko u sih. Cu lo ahcun siasal nakin ttih kan nung deuh sual lai.

 

Credit:Duh Tin Kep

Author: Salai Ephraim