North Korea ram hruaitu Kim Jong Un nih nai teah Japan he an i ramri ah a hriamnam cu hneksak nak a tuah i,South Korea nih hi thil a tuahmi hi kan mah ralrin a kan pekmi a si ko tiah a tawl rel cuahmah lio ah a voi 2nak a phomh t’han hoi.North Korea nih hin American ralkap le South Korea ralkap hna nih hmun khat ah ralkap training nak le raltuk cawnt’i nak ngeih an i timh mi cu a duh lo taktak.
South Korea nih a chim mi cu August thla chungah hin American ralkap le South Korea ralkap hna cu hmun khat ah i cawh in training an tuah ti lai tiah a rak chim.cu hnu ah Kim Jong Un nih cun Trump ton biaruahnak an neih hnu ah caan saupi chung a hriamnam hneksak nak a tuah ti lo mi cu a thar bak in a hriamnam hneksak nak a tuah t’han.a ruang cu North Korea nih South Korea ram cu American ralkap he hmun khat ah training nan ngeih awk a si lai lo tiah warning a pek duh nak a si tiah an chim.
North Korea nih naite ah a hriamnam hneksaknak a tuah mi kha Short-range ballistic missile pahnih an si i, a hriam nam hneksaknak a tuahmi pahnih ah pakhat deuh hi cu North Korea nih cu hlan ah a rak neih bal mi a si lo.midang sin in a cawkthar mi/a siam thar mi si dawh a si tiah US Agencies pawl hna nih an chim.cu hnu ah a tu hi Ballistic missile hriamnam a ngeih mi cu hneksak nak a tuah t’han rih.asinain hi kongah midang an aw-ka theih awk a um rih lo.
South Korea Nih North Korea A Hmuh Ning:
North Korea ram nih zei hmanh chim lo in Japan he an ramri zawn ah missile bomb pahnih bak hneksaknak a tuah t’han mi kongah South Korea nih cun North Korea nih a hriamnam a hneksak mi kongah zei maw thil a chuah a si ah cun South Korea nih kan theih pi lai lo tiah a rak chim.cun, Japan nih cun North Korea nih a hriamnam hneksaknak a tuah mi ruangah buaipi awk a tlak lo,thlalau awk a si lo i t’ihnung thil zong a si loh tiah a chim ve.
Cu hnu ah South Korea official pawl hna nih cun North Korea nih a hneksak mi missile bomb konghe pehtlai in dothlatnak an tuah t’ha tik ah North Korea nih South Korea ram warning pek nak caah hneksaknak a tuah mi a si tiah an chim t’han.North Korea nih a hriamnam hneksak nak a tuah mi hi short-range missile pahnih bak a si.US Intelligence pawl hna nih cun North Korea nih short-range missile pahnih hneksak nak a tuahmi ah hin pakhat deuh hi cu,cuhlan ah a ngeih bal mi a si lo tiah an chim.
Cun, North Korea ram hruaitu Kim Jong Un zong nih hi hriamnam hneksak nak kan tuah mi a ruang cu South Korea ram ralrin pek nak caah a si tiah a chim.asinain cu ruang, kha ruangah a si timi warning a pek mi hna a ruang taktak cu a chim loh tiah an chim fawn.hi ruangah hin American ralkap le South Korea ralkap joint military service pawl hna nih cun North Korea nih American he remdaihnak tuah a duh mi cu a mah le a mah lam a phih a si ko cang tiah an chim.
South Korea ram chungah American ralkap hna hi minung 30,000 renglo an um cuahmah i cu hna pawl nih an chim mi cu North Korea ram le American ram cu zei tik ah dah remdaih nak taktak an tuah lai tiah cuanh dih an si lio ah.North Korea nih South Korea warning pek nak caah mah bantuk thil a tuah t’han mi cu North Korea ram caah cun ngaihchia ngai a si tiah an chim.cun, South Korea cozah nih cun North Korea nih a tuah mithil cu kan zoh sawhsawh lai lo. hriamnam hneksak nak a tuah mi hna zong hi khua zei in dah a ngeih i a ho ta dah a cawk ti tiangin dothlatnak kan tuah lai tiah an chim.
Source: BBC