NUG Cozah Nih Kawlram Mipi Caah Ral Thawh Hrimhrim Kan Hau Cang Tiah Thanhnak A Tuah Cang

Rammi venhim nakding ah raltuk hrimhrim kan hau i anicaan fianrial a si te lai: NUG Acting President.August 17, Rammi nunnak le innlo vialte venhim nakding ah raltuk lo awk thalo kan si i anicaan tu cu fiangfai deuh in thanh a si te lai, tiah NUG Cozah caankarlak President Duwa Lashi La nih August 17, NUG caanhmaan meeting ah a chim.

“Nifatin in rammi thahnawn an si peng mi hi NUG Cozah nih kan zohsawh lo. Kan tuk (doh) ve hrimhrim hna lai. Atu hi tuanvo ngeitu hna nih dinlo in an tawlrel cuahmah. Cucu Cabinet (Cozah lutlai) sin ah an chuahpi than lai i anicaan fianh a si te lai,” tiah Acting President nih a chim.

 

Relchap: Yangon Pyusawthi Pawl Cu Ralhrangbu nih Hriamnam An Pek Hna Yangon, Hmawbi le Taikkyi peng raltuk cawnnak hmun ah cawnpiak mi ralhrangbu nih a zuat mi Pyusawthi hna cu hriamnam pek an si.Pyusawthi phu hna hi USDP chungtel, ralkap hlun, Mah-Bah-Tah chungtel chung minung hna he fonh mi an si i, atu meithal an pek mi hna hi cu ralkap hlun hna lakah fitness a tha mi an si tiah Yangon pyusawthi tuanvo ngeitu pakhat nih a chim.

Hriamnam pek mi hna hi Hmawbi in cawnpiak mi 20, Taikkyi in 20 an si. Hriamnam hi chungtel vialte pek khawh an si lo. Civil mi hna cu an umnak peng uktu bawi hna sin ah thawngthanhtu ding an si tiah theih a si.Nizan Yangon Alung buta pawng city train chung palek an kah mi hna cu PDF si lo in pyusawthi hna nih spring revolution minchiatnak caah an tuah mi a si ti mi belte cu kanmah kan si lo tiah an chim.

Pyusawthi pawl hi ralhrangbu nih Taikkyi peng Kyachong le Kuntimyaung kar ah ralhrangbu miakpi cawnnak hmun ah hriamngan, meithal hme cawnpiak an si tiah theih a si.Hmawbi le Taikkyi peng hi ralhrangbu hmunpi pakhat a si bantukin Pago yoma he a pehtlaih mi le raltuk cawnnak hmun pakhat a si.Mah raltuk cawnnak hmun ah Yangon, Pago le Mandalay pyusawthi hna cu meithal kah cawnpiak an si tiah theih a si.

Credit: TCP