Pastor Van Bawi Kam Zaitu US Nih Holh Theihlo Timi Bia Fang Cu Fianter Nak Fiang Taktak In A Vun Tuah Ve Cang

Bia hmaitthi: Tutan holh theihlo kong fianternak ka tialmi hi aho pumpak sual kawlnak le el hnialnak caah si loin Pathian bia asi bantuk in mikip caah thazang petu asi khawhnak hnga saduh thahnak he tial mi asi.Biafang um tuning: Holh theihlo timi biafang hi Greek holh in tial hmasa mi asi. An tialning cafang cu γλῶσσα, ης, ἡ (Noun, Feminine) asi. A awchuah cu “glóssa” tiah an ti. A sullam cu mirang in “tongue, language” ti asi i Lai nih cun “Holh” tiah kan ti ko. (A hmailei ah negative word a um hnu ah Holh theihlo tiah kawh asi). King James Bible ah a langh ning pawl cu;

 

1. Mark 16:17 chungah “New tongue” tiah atial i Lai holh cun “Holhthar” ti asi.Bawipa nih, Vuleicung khuaza kipah ka thawngtha va chim hna uh, a zum i tipilnak a ing mi poh nih khamhnak an hmuh lai…A zummi pawl cu hi thawnnak hmelchunh nak hi pek ansi lai, ka min in khuachia an thawl khawh hna lai, holh theihlo (holh thar) in an holh lai tiah ati.Hika zawnah a chimmi Holhthar tihi Lai Bible nih cun Holh theihlo tiah aleh. Asinain a duhnak ai khat ko. A zumtu hmel chunhnak a pek mi hna lak ah pakhat asi ve i Thil ti khawh thawnnak a ngeimi asi nak zong fiang tein hmuh khawh asi. Cucu Bawipa Zisu hmurka bak in a chuakmi asi bantuk in lih asi kho hrimhrim lo tinak alang.

 

2. Lamkaltu 2:4 ahcun “Other tongue” tiah a tial i Laiholh cun “Holh dang” ti asi. An nih cu Thiang thlarau in an khah caah Thlarau nih chim khawhnak a pek hna bantuk cio khan holh dangin an holh tiah ati.Hi Bible cang i atial mi hi a riantuan nak phundang deuh in alang. Zeicatiah Zumtu hna hmelchunh nak le thawnnak a ngeimi asi nak kha Mark nih alanghter cang bantuk in Thiang thlarau nih a herh ati ningin rian a tuan tikah Holh dangin an holh mi cu an pawng ummi miphun dang hna nih an mah holh tein an rak theih khawh ve tinak asi. Asinain miphun dang hna holh in an holh ti cu a um ruam loh, Holh dang in an holhmi tu kha an pawngkam miphun dang nih an mah holh in an rak theih titu khi asi.

3. 1Kor. 14:2 “Unknown Tongue” Holh theihlo in a holhmi cu minung sinah siloin Pathian sin ah bia a chim asi zeicatiah a chimmi kha a sullam an hngal lo Thlarau nih khan cu ti bia chim khawh nak cu a pek cu a pek ko lai “.Hi ka zawn ahcun Holh theihlo/ theihlo mi holh tibak in fiang tein a chim ve. Cucu minung sin si loin Pathian sin ah a chim mi asi tiah ati. Lih asi ti a um lo. Thiang thlarau nih a pek mi asi ko lai ati rih. Cucaah Paul nih thawngtha chim ahcun minung nih an theihmi holh hman ding…tiah ati tik ah Holh theihlo kha lih asi caah tinak asi lo. A chim duhmi cu thawngtha cu Pathian sinah chim mi siloin minung sin ah chimmi asi caah an hngalh khawhnak hnga holhtheih in chim uh tiah achim duhnak asi deuh.

 

Cu ti holhtheih lo kong a chimnak a ruang zong cu Korin khuami hna hi Thiangthlarau laksawng tinco a duhtuk mi an si caah holh theihlo hi an rak i hruhpi. A tuchan Laimi thawngtha chim pawl nih Mirang holh an uar tuk ruangah Lai lei tangli hmanh asi lomi sin ah miring nih cutin ati kha tin ati…tiah an chim lengmang bantuk in Korin khua mi zong hi holh theihlo in an rit ve caah pumhnak le thawngtha chimnak ah an hman tuktawn caah mipi caah cun holh theihmi chim atha deuh ati duhnak asi. Kan nih zong nih mipi sin ahcun Lai holh tein chim ding si ve hnga cu.Cucaah a cung kan langhter mi pawl khi an bia hman mi idang hmanh hna sehlaw a sullam le riantuan nak cu ai khat dih ko. Lih asi hrimhrim lo, adih kho ding zong asi rih fawn lo zeicatiah Bawipa Zisu nih achimmi asi i a cang lengmang rih dingmi an si fawn. Zeicatiah;

 

Pathian he i chonhnak/ Pathian sin bia chim asi. 1Kor. 14:2 . A hmang tu pumpak thazang petu asi.Thiang thlarau khuaruahhar riantuannak asi Lamkaltu 2:4.Thlarau laksawng pekmi asi. Lamkaltu 10:45-46, 1Korin. 12:10.Zumtu/ Thiangthlarau tinco hmelchunhnak asi. Lamkaltu 19:6.Mithiang Pual zong holh theihlo in a holh veko. Lih asi ati hrimhrim lo,thawngtha chimnak tu ahcun zapi theih mi holh a hman. 1Kor. 14:18Cucaah Holh theihlo a um lo lih asi a timi cu an palh bak zeicatiah Greek le Mirang KJ bible ah tha tein aum mi asi. Pathian bia cu minung nih thlen le remh khawh asi lo, an zumh lo zongah a rian tuannak nih a tak asinak a langhter zungzal ko.

Kan theih dingah aherh mi tu cu zeithil poh hi a tak (sit) a um lio ah a lem zong a um ve zungzal tawn. Cucu bible zongah kan hmuh. Thlarau laksawng Holh theihlo a um tik ah a lem zong a rak chuak ve colh ko lai. Cucu vulei phung asi. A lem tlawmpal hmuh ruangah a tak zong zumh lo cu santleih lo deuh bia asi kan ti khawh. A lem a hmang tu nih attih lo ahcun hmang ko seh acung ah biaceih nak a phan te ko lai. Cun alem um ruangah a tak zong um loh lih asi tiah ati mi cung zongah biaceih nak a phan kho ve thiam ko. Cucaah na tinco rih lo ruangah zumh lo le a um loh ti lengmang hi tih nung asi. Nu pum chungah nau ai sem tik ah a hngaltu cu a pawitu Nu asi. A ho nih kan pum chung ummi asi ve lo ruangah na pawi loh tiah al khawh asi lo. Al hmanh ah hngalh lo ruang sawhsawh khi asi ko lai.Kan Bible ca nih Holh theihlo a um loh tiah a chim hrimhrim lo. A umnak kong belte achim leng mang. Cucaah mizei hmanh nih na zumh zong zumhlo zongah nangmah ca asi. Pathian bia cu a zum tu hna caah nun nak asi i thawnnak hmual zong angei. Cucaah Bible nih a chim mi Holh theihlo a pom mi le a sit ahmang tu nan dihlak Bawipa nih thluachuah in pe ko hna seh!

Van Bawi Kam
Chin Revival Baptist Church
Omaha, NE

Author: Salai Ephraim