Paul Nih Paul Nih Ti Hlah Uh!Paul Chaan Le A Tu Kan Chaan Aa Banglo Or Aa Khat Loh.

(Zultu hna chan ahcun atlingmi a phan rih lo. Kannih chan ahcun a phan cang)Zultu hna chan cu Jesuh vancung a kai hnu in zultu hna an thih dih tiang kha zultu hna chan (Apostolic period ) ti a si. Pestecost ni hnu in zultu hnuhung bik, Johan, a thih tiang (30 AD-100 AD) kha a si. Mi tampi nihcun zultu hna chan le kan chan hi zeihmanh idannak a um lo. Zultu hna zong Petecost ni hnu i a um mi an si ve ko, zaangfahnak in khamhnak hmuhnak caan chungah a ummi an si ve ko caah, kan caan hi zeihmanh idannak a um lo tiah an zumh.Zultu hna chan i an rak tuahmi vialte hi kan tuah dih ve ding a si, zultu hna sin i Pathian ai phuan ning tein kannih sin zongah ai phuang ve rih, zultu hna nih an tinco mi vialte hi kan tinco khawh ve rih tiah an zumh. Khah thil biapi ngaimi a si caah atanglei hi tthatein vun zoh tuah!

 

1. AN KUT IN RUL AN RAK TLAIH KHAWH;Mark 16: 16 -18 ah Jesuh nih a zultu hna cu, “A zum i tipil a ingmi poh cu hi hmelchunhnak hi peek an si lai…. rul kha an kut in an tlaih lai” tiah a ti. Jesuh nihcun zultu hna sinah a chimmi a si caah rul tlaih khawhnak kha zultu hna nih an rak ngeih. Zultu hna sinah a chimmi a si caah kha lio chan i a zum i tipil a ing mi vialte caah hmelchunhnak a rak si. Atu ah zumtu Thlarau fa ai ti mi hna, rul cu na kut in va tlai hmanh; an cuh lai i na thi bak ko lai. Billy Graham zong nih rul cu tlai bak seh, a cuh lai i a thi ko lai. Khakha kan idannak a si.

 

2.SIVAI NGEIMI NIH A RAK TEI HNA LO;Mark 16: 18 ah (a zum i tipil a ing mi cu) sivai an ding zongah an zeihmanh a ti lai lo (when they drink deadly poison, it will not hurt them at all) a ti. Khakha zultu hna chan lio ah a si. Zultu hna sinah a chimmi a si caah kha lio chan i a zum i tipil a ing mi vialte caah hmelchunhnak a rak si. Atu ah zeidang poison vanchimlo hmaifa si hmanh ding tuah ca, na thi ko lai. Na piantharnak nih an khamh bak lai lo. Na hlimlaam nak nih an bawm lai lo.

 

3.MIZAW CUNG KUT CHUAN IN DAMNAK HMUH KHA ZUMTU HNA HMELCHUNHNAK A RAK SI;Mark 16: 18 ah “A zum i tipil a ing mi poh nih…. Mizaw cungah an kut an chuan lai i an dam lai” a ti. Zultu hna sinah a chimmi a si caah kha lio chan i a zum i tipil a ing mi vialte caah hmelchunhnak a rak si. Atu ah a zum i tipil a ing mi poh nih mizaw cungah kan kut kan chuan i damnak an hmuh khawh ahcun sibawi le sizung hi kan herh hna hnga maw? Tuchan ahcun zumlotu an paw a faak, zumtu zong kan paw a faak ve. Zumlotu an mit a faak, zumtu zong kan mit a faak ve. Zumlotu an tak a lin, zumtu zong kan tak a lin ve. Pathian nih atu kan chan ah zawtnak a damh lo ka ti duhnak a si lo. Atu kan chan ahcun zumtu asi mi pohpoh caah zultu hna chan lio bantukin zawtdamternak hi zumtu hmelchunhnak a si ti lo ti kha ka chim duhmi a si. Kan chan ai dang.

 

4.ZULTU HNA CHAN AHCUN AW LE VANMI HMANG IN PATHIAN AI PHUANG RIH;Zultu hna chan lio ahcun Pathian nih minung hna kan caah aherhmi chimphuan dingmi a ngeihmi kha a rak i phuan dih rih lo caah aw in siseh, vanmi in siseh ai phuang rih. Atu kan chan ahcun Pathian aw ka theih ti le vanmi ka hmuh ti cu lih lawngte khi a si ko cang. Pathian bia cu Baibal ah pei ai ttial dih ko i theih cu nan duh lo i nan rel duh lo cu. Pathian bia rel i theih a duh lomi hna i Pathian aw (bia) ka theih ticu ka lung nan hring.

 

5.ZULTU HNA CHAN AHCUN HNGALHNAK A RAK PEEK HNA;Zultu hna chan ahcun vancung khua hna a rak hmuh ter hna. Moses ruak hna zeiti i a um hna a rak hngalh ter hna. Hmailei i a ra te dingmi thil kong hna a rak hngalh ter chung hna i an chim ning bantuk bakin a tling taktak. Tuchan i hngalhnak e, vision e an timi tam deuh hicu zeitikhmanh ah a tlam a tling ti lomi an tam. Lih maw an chim, khawchia nih dek a hmuh ter hna!

 

6. ZULTU HNA CU BAIBAL TTIALNAK NAWL A RAK PEEK HNA;Zultu hna chan ahcun Pathian nih minung vialte hna kan caah a herh a timi vialte kha ai phuan cuahmah lio a rak si caah, an sin i Pathian ai phuan nak hi ahmanmi phuannak a rak si. Cucu ca in an rak ttial i Baibal ah ai cang. Atu kan chan ahcun Pathian biaphuan le hngalhternak kha a dongh cang caah Baibal ttial chap khawh nak kan ngei ti lo. Pathian nih kan sinah bia i phuang rih selawcu Baibal hi ttial chap nak nawl zong Pathian nih a kan peek rih hnga. Zeicatiah pathian bia ttialmi cu Baibal a si.

 

7.ZULTU HNA HMUHTONMI CHIMPHUAN KHA A KAN FIAL CANG;Zultu hna chan ahcun Pathian nih direct in an sinah bia a rak phuan mi chimrel kha a rak fial hna. Kan nih chan ahcun zultu hna nih an rak hmuhtonmi chimrel kha Pathian nih a kan fial cang. Zultu hna chan ahcun miphun dang holh, an thiam bal lomi holh hna in bia an rak chim khawh. Zumlotu an khuaruah a rak har tuk i Jesuh zumh khawh nak caah an rak hman (1 Kor. 14: 22). Atu kan chan ahcun Thiang Thlarau nih kan thiam bal lomi miphun dang holh in holh khawh nak caan kha a khar cang (1 Kor. 13: 9- 12). Na zumh lo ahcun Pathian bochan bu bakin na thiam bal lomi miphun dang holh in va holh hmanh, na lih lawng tein na holh ko lai. Tuchan ah a peek ti lo caah a si.

Credit: http://Aung Myint Thang

Author: Salai Ephraim