Rakhine ramkulh chung Minbaya pengtlang ah a um mi Chin miphun hna um nak Daingthar khua pawng teah AA hriamtlai pawl hna le Kawl ralkap pawl hna cu faklak in an i kap t’han i Daingthar khua ah a um mi Chin miphun pawl hna cu thinphang in kan um tiah Daingthar khua,khuabawi U Kyaw Zaw Phyu nih a chim.U Kyaw Zaw Phyu nih a chim nak ah cun AA le Kawl ralkap an i kah nak hmun hi khua in meng 2 tluk a hlat nak hmun ah a si tiah a chim.
Cun,Daingthar khuami kan thin a phannak cu AA le Kawl ralkap pawl hna nih October 15 zinglei suimilam 8:00 in i kah hram an thok i,suimilam 2 chung bak an i kap.cu pin ah hriamnam t’ihnung bomb tampi an hman veve caah khuami hna cu i dornak kawl in hmu kip ah kan i t’hek cio.biatak tein hriamnam t’ihnung an hmang chung hi cu suimilam 2 chung hrawng a si.a tu zongah khua chungin an i kah thawng, meithal puah thawng cu kan theih leng mang fawn tiah a chim.
Rakhine ramkulh chungah Daingthar khua hi Chin miphun hna um nak khua le ram a si a inn cun inn 78 an si i,Chin miphun hna hi a minung cun minung 445 an um nak khua a si.a mah belte Biaknak lei ah cun Daingthar khua um Chin miphun hna hi a cheu hna cu Buddhist biaknak a biatu an si i,a cheu hna cu Khrihfa an si tiah U Kyaw Zaw Phyu nih a chim.cun,Daingthar khua pawngah AA le Kawl ralkap hna a tu bantuk in an kah nak hi tuchun in thlahnih tluk a si cang tiah a chim.
Curuangah Daingthar khua ah khuasa mi Chin miphun hna cu Loram rian zong kan t’uan ngamlo,ni fa tin in lungrethei in zei tik ah dah Khua chungah an i kah lai i zei tin dah kan him lai tiah lungrethei in caan hmang peng.ti-rawl ei awk a ngei tam deuh mi hna nih ei awk a ngeilo mi hna kha an khan t’henh phawt cio awk zong a si fawn.Rakhine ramkulh a cozah zong nikum ah khan din-ei awk kan harsat ruangah voikhat cu a rak kan bawmh cang.Asinain a tutan ah cun zei hmanh an chim lo caah le kan Loram tuah mi le kan Cinthlak mi hna zong mi zei hmanh nih kan bultawl ngamlo caah Caw,Naa nih an t’am dih fawn.lungrethei taktak kan si ko tiah U Kyaw Zaw Phyu nih a chim.
Credit: chindwinpost
