Ralbawizik Fanu Duhleng Cu Zantim Le Khuamang Ah Mong Nawn Tein

Zaantim le khuamang ah Nightclub in a tin mi Duh-Bohmugyi fanu cu SAC ralkap nih minung palh in an kahthah.September 18 lio zaantlai hnu ah Nightclub in a rak tin mi SAC phu Duh-Bohmugyi Ko Ko fanu Lamin Sandar cu minung i palh in apa Ko Ko naule nih meithal in an kah sual i a thi.

Sentari cong pawl nih a motor an kham i a dir duh lo ruang ah meithal in an kah i a thi, tiah amah he aa naihniam mi hna nih an facebook cahmai ah an tial.Lamin Sandar cu Yangon khua Yankin COVID-19 Centre ah volunteer rian a tuan lio mi a si, tiah PDF Channel nih a langhter.

 

Relchap:Thantlang Khuami 7,000-8,000 kar an Zaam, Minung 10 Fai Lawng Khua ah an Taang. Thantlang khua innkangh le pastor Cung Biak Hum meithal in kah a ton hnu ah Thantlang khuachung um ttih a nun cang caah September 19 le 20 ah Thantlang khuami 7,000-8,000 karlak nih an innlo an chuahtak i hmundang ah an zaam hna, tiah ttuanvo ngeitu upate sin in thawngpang kan theih. “September 19 le 20 ah mi tam u cu zaam dih a si cang. A zaammi hi minung 7,000-8,000 karlak cu kan si lai.

Atu Thantlang khuachung ah cun bochanmi upa cheukhat he minung 10 fai lawng an taang cang,” tiah atulio Thantlang ralzaam kongkau a tawlreltu Thantlang Placement Affairs Committee (TPAC) chungtel upa pakhat nih a chim.Atulio Thantlang khuachung vung luh zong ttih a nung i atu khuachung ah a taangmi hna zong hi a rauh hlan ah an chuak ve te lai, tiah a chim chap. “Atulio Thantlang khuachung vung luh hi cu ttih a nung ngai, a him lo ngai.

Hi hlan ah cun zei pipa cu kan tong hraw rih lo nain atu hnu belte cu kanmah zong kan kal kho ti lai lo dah. Atu Thantlang ah a taangmi hna zong hi a rauh hlan ah an chuak ve te lai,” tiah a chim.Thantlang khua a chuahtakmi hna chung in minung 400-500 karlak hi Mizoram lei ah an zaam hna i a dang hi Thantlang peng khuate pawl ah an i dor hna. Kahdohnak a umnak Lungler telh in khua pathum hi ramlak ah ralzaam dirhmun in an um hna. “Thantlang ralzaam kong he pehtlai in cazin kan tuah cuahmah lio a si.

An i dornak hmunhma pawl ah kanmah pumpak zong vung kal kan i tim. Thantlang peng ralzaam kong ah atu tiang ah cun bawmhnak ngaingai a um rih lo. Ramchung le ramleng bawmhnak khulrang in kan herh ko,” tiah a cunglei ttuanvo ngeitu upa nih a chim chap. Atulio Thantlang ralzaam hna bawmhchanh a duhmi hna nih Phone-09 42393 5703 (TPAC) ah hin pehtlaihnak tuah khawh a si.

The Chin Journal
September 21, Hakha

Author: Salai Ephraim