Ralhrang Kut Tangah Khuabawi Rian Tuanmi Vialte Mizei Hmanh Nan Rian Nan Ngol Lai Lo Tiah AA Nih A Hro Cer Hna

Rakhine Ramkulh Ah Khua Bawi Hna Nih Rian Chuahnak Ca An Ṭialmi Cu AA Nih An Rian Pehzulhter Dingin An Auh Hna.Rakhine ramkulh, Punakyun(ပုဏ္ဏားကျွန်း) le Yathetaung(ရသေ့တောင်) peng ah SAC ralkap kuttang rianṭuantu khuabawi hna cu an rian chuahtak dingin ca an ṭial i ULA/AA nih rian chuah lo dingin an chimh hna, tiah theih a si.Nizaan January 2 chun sml 12:00 hrawngah Punakyun peng ULA/AA zung ah Punakyun peng in khuabawi 70 leng le Yathetaung peng in khuabawi 20 hrawng cu an auh hna i an rian ṭhing ṭuan ṭhan dingin an forh hna, tiah theih a si.

“Punakyun peng in khuabawi 70 leng le Yathetaung peng in khuabawi 20 hrawng kan si. ULA/AA nih khua bawi rian nan ṭuan ṭhan lai an kan ti. Nanmah nih nan ṭuan lo cun midang a ṭuan ding an um ti lo. Nan ṭuan lo ahcun SAC zong harnak a tong khomi an si, tiin an kan ti,” tiah zung ah a va kal vemi khua bawi pakhat nih a chim.

Punakyun peng khuabawi hna cu khuabawi rianṭuan an duh ko nain SAC ralkap le AA kar kahdohnak zeitik ah dah a chuah lai ti an hngalh lo leng ah kahdohnak lioah khuabawi rianṭuan an duh lo, tiah theih a si.A luancia November 15 lioah Punakyun peng khuabawi 90 leng cu an rian an chuahtak pinah December 16 lio zong ah Yathetaung peng khuakomh 19 in khua bawi 19 zong khuabawi rian in an chuak. A hlan lio nakin khuabawi hna ca ah harnak a tam kho, tiah khuabawi hna nih an chim.

“Hramhram in kan rian pehzulh dingin an kan chimh. Nanmah nih nan ṭuan lo ahcun mizei nih dah an ṭuan kun lai an kan ti. Kan ṭuan lo ahcun pakhat khat in an kan tuah lai ti phan a um. SAC kuttang ah rianṭuan kan duh lo ruangah kan chuahmi a si i rianṭuan ṭhan kan duh ko tiin maw ca kan ṭial ṭhan lai ti kan ruat,” tiah khuabawi pakhat nih a chim.

Credit: The Chin Post

Author: Salai Ephraim