Ralhrang Le PDF Ralkap Mipi Nih An Thleidan Kho Ti Hna Loh

August 30, Sagaing Ramthen Tantse (Tangse) Peng Leikchan khua ah PDF bantuk in aa umter mi SAC ralkap pawl an lut i an lorhnawh hna, thilri an hrawhpiak hna tiah theih a si.“Zapi thuam he khuachung ah an lut.

PDF bantuk in an i umter i a hramthok ahcun PDF ah kan relsual tak ko hna. Kan vun i naih deuh hna tik ah SAC ralkap an si kan theih i khuapi in kan zaam,” tiah khuami pakhat nih a chim.A rak lut mi SAC ralkap hi minung 20 tluk an si i atu hi an vun i chap than ca ah minung 80 hrawng Leikchan khua ah umhmun an khuar.

Inn kip ah an lut. Thilri an hrawh. Meithal an puah. Thil man fak deuh pawl an lak. Vok le ar an thah hna i an ei hna. An riahcaw a dih poh ah khuachung ah an lut i an buai. Nihin tiang ah khuami thah an tong lo nain pehtlaih khawh ti lo mi 5 hrawng an um, tiah Mizzima nih a tial.

Credit: Laica + The Hakha Times