Ralhrang Minung Zali Le Sawmnga Thum Hna Nih NUG Sin Ah I Pehtlai In An I Fonh

September 23 Zarh hnih chung ah SAC ralkap le palek minung 453 nih CDM tuah in mizapi sin ah an i fon, tiah National Unity Government (NUG) nih a thanh.“CDM tuah in mizapi sin ah a rak i fon mi hna hi SAC phu kuttang ah palek le ralkap a tuan lio mi lawngte minung 453 an si i NUG sin ah pehtlaihnak fel tein an tuah hnu ah

CDM a tuah mi an si,” tiah NUG Runvennak Minister Zung in Permanent Secretary U Naing Htoo Aung nih a chim tiin PDF Channel nih a langhter.Hi CDM a tuah mi palek le ralkap hna hi September 7 lio ah NUG Acting President Duwa Lashi La nih D-Day a thanh hnu ah CDM a tuah mi an si, tiah kan theih.

 

Relchap: Lunglawmhnak.Thantlang khua September 18, 2021 kahdohnak a cangmi ah a khalhmi turuun innlo kangmi meiphalh ding a kal lio lampi ah Sahramg 666 nih meithal in an kah I a nunnak a liammi kan Pastor Cung Biak Hum i a taan takmi chungkhar nih CDF-Thantlang ca ah $2,000 an kan hlut.

Mah lawng a si lo! Thantlang kahdohnak ruangah ralzaam dirhmun ah a dirmi Thantlang mipi ca ah $1,000 zong Pastors Fellowship sin ah an bawmh fawn.
Pastor Cung Biak Hum le a taantakmi chungkhar nan cungah kan I lawm tuk hringhran. Nu farual hmailei nan khuasak tintuknak ah kan Biakmi Pathian nih in umpi in lam in hruai hna sehlaw a thluachuah nan chungkhar cungah ruah bang surter ko seh!

Pastor Cung Biak Hum, nan nunnak na pekmi hi Thantlang ca lawng ah a si lo bantukin Chinram ca lawng zongah a si lo. Vawlei pumpi ah dinfelnak, federal le democracy a um khawh nakding ca ah a si. CNA/CDF nih na phu an hlam hrimhrim lai. Cu lawng si loin na thihpimi Dinfelnak, Federal le Democracy zong Kawlram nih a hmuh tiang an sining dihlak pek in an zuam lai.

Na dawt CNA/CDF nih teinak an hmuh tik ah Vanram tu in lunglawm te in na rak kan zoh te lai i, na nunnak a lakka in a liam lo zia na khalhmi Thantlang Peng mipi nih vawlei dongh tiang cinken in an phuan lai.

GTRO-Media Team

Author: Salai Ephraim