Ralhrang Nih KNU Kahdohnak Caah Nunau Hriamnam Ah An Hman Cang Hna

Ralhrangbu nih KNU kah an timhnak ah nunau pawl cu an phaw caah an tlaih hna i, an hruai hna tiah Klo FM nih a chim.Nizan September 1 zinglei ah KNU brigade 6 Dooplaya pengkomh Kyainseikgyi peng Pikaladon khuami nu pakhat an tlaih pin ah Yakya khua mi nu pakhat le Mikatho khua in nu 2 hna cu an tlaih hna i, an kalnak kip ah an hruai hna tiah KNU brigade 6 thawngthanhnak nih a chim tiah Klo FM nih a langhter.

Hi kong he pehtlaih in KNU concerned group in Pado Naw Sipho Yar Sein nih ralhrang bu nih nunau hna raltuknak ah an hruaimi hna cu zeitin hmanh in cohlankhawh ding a si lo.

A hlan in Karen ramah kahdohnak tampi kan ton cang.Nunau hna cu ralhrang pawl nih a phunphun in an tuahto hna.Atu raldohnak ah phaw ah an hman mi cu zeitin hmanh ka cohpan khaw lo.Vawleicung phung an buar mi a si. An cungah hremnak kan pek a hau tiah a chim.

Ralhrangbu hna nih KNU/KNLA doh dingin Mikatho khua hrawngah umhmun an khuar tiangah a rauh hlanah kahdohnak a fak te khomi a si. Atu ah mah pawngkam in a zaam mi 500 hrawng cu an tlung kho rih lo tiah Than Lwin Times nih a tial.

Credit: The Chin Post