Ralhrangbu In A Zaam Mi Pahnih Nih Cun Min Aung Hlaing Nih Ti Tawl Ei Din Khim Te In A Kan Zoh Kho Ti Lo

KNU/KNLA hmunhma chungah a ummi ralhrang hna cu ei le din an har ngai, rawl zong khim in an ei lo tiah ralhrang in a zaam mi hna nih an chim.August thla lai hrawngah KNLA brigade 5 area ah a ummi ralhrang Nyatakhukalo (ညာတခူကလိုး) sakhan in ralhrang 3 hna cu Thanlwin tiva tan in an zaam.An zaamnak ah pakhat cu ti ah a tla i a thi. Pahnih hna cu Thai lei (Thumwethah) Karen khua pakhat ah an lut i khuami hna nih an himnak caah tawlrel piak a si.

Hi ralhrang 2 hna nih an chim ningah kan sakhan chungah rawl khim in kan ei kho lo, a chel caan ahcun buh cak lawng kan ei.A caan ahcun ruahti a cin cia mi facang uih mi hna kan ei.Ration a rak phanh khawh lo ruangah eidin kan ngei lo caan zong a um.KNLA ral kan tih ruangah tam deuh cu khor chung lawngah kan um. A herh taktak mi ti lo ahcun khor acungin kan chuak bal lo. KNLA sniper nih an kan kah ruangah a thi mi zong an um. Cheukhat cu ti hmanh an i kholh ngam lo tiah an chim.


Thanlwin tiva ral, Thai ram lei ah a um mi Thawlethah (Karen khuami) nih an chim ningah; ralhrang sakhan cheukhat hna nih eidin le an herhbau mi kuak, saphiat tibantuk hna cu Thai lei lawng ah an cah hna.A hlan bantukin langtlangin i chanh khawh a si lo ruangah a thli in an rak cawk tawn tiah an chim.Karen ramchung ralhrang sakhan cheukhat hna cu KNU/KNLA nih lam an phih piak hna caah eidin ah harsatnak tampi an tong ralhrang a zaam mi zong an um.


Kan hnu May thla Thai ralkap nih a thli tein chanh an timh mi facang tun 700 cu online ah thawngpang a chuah ruangah KNLA nih kan kah lai an ti ruangah thulh than a si tiah theih a si.Mekhathah ralhrang sakhan zong KNLA sniper pawl nih lamhla in an kah lengmang ruangah a thi le hliam zong an um. Chun ah khorchung lawng ah um a si. Zan ah lawng leng kan chuak, sakhan lengchuah dingah bomb ral tih a si tiah ralhrang cheukhat hna nih an chim.

Source: SP ( TCP )