Ralhrangbu Meeting An Tuah Lio Ah An Luh Hnawh Hna An Captain Telh In Minung Pahra Um Hmun Ah Thah An Si

SAC Ralhrang Meeting an Tuah Lio ah PDF-Shan nih an Luh Hnawh Hna.Nizaan (August 15) zinglei sml. 7:00 hrawng ah Shan ramkulh, Namsan khua ah meeting a tuahmi SAC ralhrang pawl cu PDF-Southern Shan State Generation (SSS-G) nih an luh hnawh hna i Captain pakhat telh in ralhrang 10 hrawng an thah hna.


“Thil sining zapi fiang in chim awk a ttha rih lo. Asinain, hmanthlak pawl hi cu anmah SAC lei nih an thlak i kan sin ah a phanmi a si. SAC ralkap bawmtu an auh hna caah khulrang in kan kir hna,” tiah SSS-G nih thawngthanhnak ah an langhter. SSS-G nih meeting a tuahmi SAC ralhrang pawl an luh hnawh hna lio ah kap hnih kahdohnak a chuak i SSS-G lei in minung pakhat hliam (fak lo) a pu ve.

 

Salai Dokhar Hmurka relchap:Teinak cu a dikmi dirkamhtu kan caah asi.1.2.2021 ralhrang pawl nih mipi kan nawl ngeihnak vial te cu hriamnam bochan in hram hram in a kan lak piak dih. Cu ruang ah mipi nih ralhrang uknak kan duhlonak langhter le federal democracy ram ser kan duhnak cu lamzawhnak in siseh, CDM tuahnak in siseh; darkhuang tumnak in siseh kan langhter. Cun facebook, twitter ..tbk hmang in a phun phun in ralhrang cu kan rak doh.Minung lungput ngei lomi ralhrang pawl sinah daihnak in ram dothlennak tuah ding in cawlcangh cu asi kho lai lo tiah kan zumh cia bantukin atu cu hriamnam tlai in ralhrang pawl nih hriamnam in an kan chuhmi nawl ngeihnak lak than in federal democracy ram ser cu timtuah asi cang.

Kei zong february thla dih tiang lamzawhnak tuah in ram a thlen lo ah cun hriamtlai ve ding in ka hawi le cheukhat he timhtuahnak kan rak ngei ve. Nain 27, 2,2021 (Mon National Day) ah ralhrang pawl nih an ka tlai i Ni 124 thawnginn ah an ka chiah caah hriam tlaih ding in kaa timhtuahmi ka saduhthah vial te arawk dih. Ka hawi le pawl cu CNF/CNA, KIO/KIA le adang dang Tlangcungmi hriamtlai hna sin ah Training an kai i mipi kan nawlngeihnak lak tthan ding le federal democracy ram ser ding ah an cawlcaang thluahmah cang. Hriam tlai kan unau hna le CDM a tuahtu kan hawi kom hna hi kan ram a thleng zawk zawk ding ah kan rinhchanmi cu an si cang.

Thawnginn chung in ka chuah hnu thlakhat leng asi cang nain ralhrang pawl nih an ka hremnak ka hma hna adam kho rih lo. Cu lawng si loin kalu ah bo lakin an ka hremnak hma cu siibawi pawl nih operation tuah aherh an ti caah thawnginn in ka chuah hnu ah hriam ka tlai tthan hrim lai tiah saduh ka thahmi cu a tlamtling kho ti lo. Sii bawi pawl nih ka hma thlop ding ah Myanmar ram ah cun Yangon; Mandalay le Naypyidaw lawng ah thlop angah an ti caah sii thlop ding ka him lo caah ram tthat hlan chung poh cu i thlop kho lo ding dirhmun ka si. Sihmansehlaw; ram caah nunnak pek tiang in a cawlcaangmi kan unau hna hmai ah cun kei cu ka tuarnak tete chimkhawhnak caan ka ngeih rih caah ka tuarmi aning deuh ngai rih.


Zei caan tiang dah hi ralhrang pawl nih kan nawl ngeihnak hi an lak rih lai tiah ruah ah cun nun man ngei lomi minung ko kan lo. Nain a tu lio mino hna nih ram an dawtnak in nun pek in ralhrang an dohnak; Coza rian ttuantu pawl nih an pawcawmnak hlonh in ral an dohnak le mipi nih mino cawlcanghnak le CDM tuahtu hna dirkamh in federal democracy ramsernak ah thazang kan chuahmi cu kan biakmi kan Pathian nih tlam atlinter hrim lai tiah ka zumh. Kei zong August thla dih in Thonginn chung hremnak a tongmi hna kong chim phuannak in siseh; hriam atlaimi kan unau hna le CDM a tuahmi ka hawikom hna he ifonh in federal democracy ram sernak ah kan si ning dihlak in thazang ka chuah ve tthan hrim lai ti hi ka biatiam asi.

Kum saupi kan ramah dothlennak tuah ding in rak cawlcangh a si nain teinak tling kan rak hmuh kho lo caah teinak kan hmu kho hnga maw tiah lunghring mi an um. Cheukhat nih mah pawcamnak le nunhimnak caah tiah ralhrang hna an tanh; cheukhat nih ka khim ko ka him ko ah cun zei hmanh tuah a herh lo tiah an ruah. Nain ram dawtu hna le thil dikmi a dirpi mi poh nih cun pawcamnak kal tak, nun pe in hriam nam tlai in ralhrang kan doh. Cun phaisa thazang le thlacamnak thazang in thil dikmi dirpi in hmai le kan tefa chan tiang ah a ttha lomi ram hruainak a um khawh lo ding in le nun zia tthat lo; ruahnak thalomi kan ram ah a thaw a chuah khawh lo ding in kan cawlcaang cio. Cu caah teinak cu a dikmi dirkamhtu kan mah caah asi caah a rauh hlan ah kan tuanbia ah a um bal rih lomi teinak bual cu kan co hrim cang lai.

Salai Dokhar
16 August; 2021