Ralhrangbu Nih An Khar Piak Mi Sii Zung Cu Khua Mipi Nih Thih Ngamh In An Hawn Khawh Than

Ralhrangbu Nih An Kharpiak Mi Hna Tamakhan Sii-inn Mipi Nih An Hon Than Uknak ala tu ralhrangbu nih thla 6 renglo an khar piak cang mi Phakanh khuapi Tamakhan khua sii-inn cu covid-19 zohkhenhnak sii-khan ah khuami nih an hon than tiah theih a si.Khuami hna khuakhannak le zohkhenhnak tangah covid-19 mizaw zohkhenhnak caah kan honnak ni 4 a si cang.

Atu lio ah sii-inn, sii-khan kal a fawi lo.Phakanh sii inn pi kan panh pi zongah an kan zoh kho lo.Duh zong an duh lo.Cun, mizaw a kalpi mi hna a thi mi zong an tam,mah caah khuami zapi hnatlaknak in kan hon than mi a si.Atu hi ni 1 hnu ni 1 covid-19 zawtnak a karh lengmang,khuami nih tangka kan ngeih lo zongah i zohkhenh khawhnak caah kan timh mi a si.

Zapi i bawm cio in kan tuah mi a si.Covid-19 mizaw le khuachungah a damlo mi a ho poh a lakin zohkhenh dingin kan timh.Tawifiang tein chimh ahcun “a si khawh chungin kan minung cu kan mah nih kan chanh lai ti nak a si ti” tiah sii inn rian ngeitu pakhat nih a chim.Tamakhan sii-inn hi ralhrangbu nih uknak an lak mi duh lo in sii-inn riantuan hna cu CDM an luh dih ruangah ralhrangbu nih an khat piak mi hna a si.

Mipi nih mah sii-inn hon than khawhnak dingah anmah tein an cawlcanghnak le bawmhnak in an hmuh mi phaisa sing 800 hrawng he sii-inn hi an hon than khawh mi a si. Siibawi 2, nurse 5 an ngei.Tamakhan khua ah hin covid-19 mizaw 70 leng an um, minung 10 nih an nunnak a liam cang tiah theih a si.

Credit: KNG