Hakha ah General Aung San dum le zuk caan saupi a um cang. A hlan ah cun pangpar le thingkung hna an i dawh ngai caah Hakha a dawhter i zapi nih i dinhnak, hmanthlaknak le video thlaknak hmun rem ah rak hman cio a si.Hi zuk statue nih Chinram le Chinmi caah chiatnak a chuahpimi a um hrimhrim lo. Hmailei zong ah a chuahpi lai lo.
Aung San cu kan ram luatnak a chuahpitu a si lawng si loin amah pumpak teimaknak lungthin upat a tlak caah upatnak zuk an chiah tiah zapi nih rak cohlan cio a si ko.Atu cu Aung San dum ah Hluttaw zung an sak cang caah Aung San zuk cu hmundang ah thial an timh a si. Ralkap chan in a um ciami a si ko. Hohmanh nih kan hnu thla tiang ah an buaipi balmi a si lo, buaipi tlak zong ah an ruat lo.
Nain, cheukhat nih mipi vote ngah khawhnak ding caah Aung San zuk cu ‘politicise’ an tuah, pumpak party larnak caah miphun kar huatnak le ram caah nunnak tiang a pemi Aung San huatnak meitil an kau. Hiti a buaimi tam deuh khi ram caah an i pekchanhmi hmuh awk ngai a um lo, NGO hmete le miphun min ai bunhmi party dirh in INGO sin ah donation(bawmh) hal tawnmi an si ti cu theih cio a si.
Kan hnulei ah a rak chim mi ka thil chih;India ram independence ngahtertu Gandhi zuk cu Mizoram khualipi Aizawl khua lai cem bak ah rumra ngei ngai in an bunh, 1985 kum ah. Tuni tiang an tamh, zoh dawh ngai in an zohkhenh i upatnak an pek.
Hi Gandhi zuk ruang ah India miphun dang nih Mizo nek deuh a um lai ka zum lo, India rammi kar lungrual deuhnak tu a chuahpi lai ka zumh.Tulio Chin mino lakah rampi level lungrualnak (union spirit )a tuakmi kan tlawm, mah miphun tanh in miphun dang huatnak(racism, nationalism) karhter ai timmi kan tam. Kan miphun caah chiatnak ngaingai a chuahpi lo ding Gen. Aung San zuk kong hna ah thih ngamh in a buaimi cheukhat hmuh tikah lung a tha lo ngai ko.
Zeiruang ah dah mah Aung San zuk hi 2006, 2010 or 2015 hrawng ah khan an rak doh cang hnga lo? A hlan tein pei Bethel Baptist Church(Hakha) thlang te ah a um peng ko kha! Yangon hrawng donor an kawlnak ah Hakha an phan bal ti lo i an rak hmu bal lo asi hnga maw?
Credit: Salai Lungthli Tum