Ruat ve hnik: Mirang nih Kawlmi he ṭhen in Tlangcungmi a dangin an kan ukmi kha a ṭha maw a ṭha lo kan ti?(Salai Van Lian Thang)

Daw Aung San Suu Kyi nih Panglong conference aa semnak a tuanbia kha tlawmte a chim.”Mirang tangah Tlang cungmi cu Kawlrawn (Kawlmi) he ṭhen in uk a rak si. Independence pek hrim ding dirhmun a phak tikah Tlangcungmi cu pek rih lo dingin hrelh dingah izuamnak zong a rak um” tiah DASSK nih a chim.Hihi a hmanmi a si ko. Kawl he komh in luatnak lak ding kha Mirang bawi upa tampi nih an rak kan duhpi lem lo.a bikin Vuncichok Winston Churchill Acozah nih. Kan tangah nan um rih lai i, hnuah nan mah tein luatnak kan in pek te hna lai, an rak ti. Panglong khua kan kal laiah Falam meeting ah Laimi dirhmun zong cu Mirang uknak tangah um rih ding kha a rak si taktak. Mirang nih Tlangcungmi viar komhin ramkomh bupi dang tein dirhpi ding zong kha chunmang an rak ngei bal.

 

Cu policy cu Kawl phunṭanh nih an rak huat ngai. Abikin cu timhtuahnak a kalpimi Director of Frontier Areas Administration Mr. Stevenson cu an rak duh lo ngai. Nain, England ram thimnak ah Winston Churchill a tlak hnuah Vuncichok Attlee a hun kai i, Tlangcungmi cu an kan ruat ti lo. Kawlmi hruaitu lawng kha London ah luatnak laknak kong ceihti dingin a sawm hna. Kawl he ṭhen in upadi dangin Tlangcungmi uk kan rak sinak zong cu mah miphun hna hi nunphung aa dangmi an si i, Kawl nih an chilh te sual hna lai, timi phanpiaknak ngeih dawh khi an rak si. Cucaah Inner Line Permit (ILP) timi an rak ser i, Tlangram ah duhpoah in Kawlmi an rak lut kho lo.

 

Ruat ve hnik: Mirang nih Kawlmi he ṭhen in Tlangcungmi a dangin an kan ukmi kha a ṭha maw a ṭha lo kan ti? Mirang bawi upa (abikin Churchil Acozah) nih Kawl he hmunkkhat ah independence lak rih lo ding le anmah Mirang tangah um rih dingin khua an rak khanmi kha a ṭha kan ti maw a ṭha lo kan ti?”Bochoh Aung San hruaimi Kawl palai phu cu England ah an va kal i, Mirang Acozah sinah Tlangcungmi vialte huapin luatnak pekti dingah an va hal. Cu lioah Shan sawbua nih “Aung San le a phu nih aiawhnak nawl an kan ngei lo” tiah London leiah thilri an rak tuk. Cu lioah Shan mino hna nih “Aung San le a phu nih ai a kan awh ko” tiah thilri an rak tuk ṭhan ve. Cuticun Aung San-Attlee agreement cu min an thut khawh” tiah DASSK nih a chim.

Hihi a hmanmi a si ko. Shan sawbua nih “Aung San le a phu nih Tlangcungmi aiawhnak nawl an kan ngei lo” tiah London leiah ca an rak kuat taktak. Cun Director of Frontier Areas Administration zong nih a nolh ve rih. Cu cakuat nih London ah a ummi Bochoh Aung San te cu awlokchong in a chiah ko hna. Chim awk an hngal ti lo. Tikah Rangoon leiah a rannak in an chonh hna i, Phasabala hruaitu (U Pekhin tbk) kha Tawnggyi ahcun an thlah zokzok hna i, Shan mino phu (U Thun Myint tbk) kha an hrih colh hna. Shan mino 200 hrawng cu a rannak in an pumh hna i, “Aung San le a phu nih ai an kan awh ko” tiah London leiah thilri cu an tuk zok ṭhan ve. Phundang cun: Shan sawbua le Shan mino phu cu an mah le anmah an kehleng an rak i phelh, kan ti lai.

 

Ruat ve hnik: Shan sawbua hna dirhmun hi maw a rak dik deuh asiloah Shan mino pawl dirhmun hi dah a rak hman deuh? Phasabala party hruaitu Bochoh Aung San nihcun Tlangcung miphun cu ai a kan awh khawh taktak maw?Pakhat lawng ithim kha a hau. Pahnih in i thim khawh asi lo. Na phit hnuah a phi na chuahmi nih tuchun ah khoika zon dah na um timi na dirnak ramkhel dirhmun (Political Position) kha fiangruai in an hmuhsak ko lai.Shan sawbua hna dirhmun he hin nai kalh ahcun tuchun Tlangcungmi dohthlennak a tuahmi he nai kalh tinak tluk asi hnga i, Phasabala party nih ai an awh khawh tuk ko ahcun cucu kan i dannak hna cu asi ko.Credit:Salai Van Lian Thang