Mai Sang Te le a fanu kong ah siseh, AA hriamtlai kut in luatnak a hmu mi hna Chin mi minung 39 hna kong ah Salai Isaac Khen nih a lungum bia a chim i Chin miphun kan nunphung cawisannak le thangthatnak kong a tial ve. A catial uar a um tuk, a tang lei hi a mah tial ning tein kan rak tarlangh.Thangtthat le hlorh awktlak a simi Chin miphun nun phung dawhMai Sang Te le a fanu cu an chuahkehnak a simi Falam peng, Farso khuami le Pastor nih Kalay-Falam lamtthen tiang an don hna ti ka theih cu thang that an tlak tuk hringhran.
Chuahkehnak khua kaltak in Yangon khuapi chung ah harsatnak le vansannak nganpi he caan a rak hmang ko nain achuah kehnak khua a phak ahcun khuami hna nih sunglawi taktak le lumsa taktak in an conglomh i an don hna. Nihlawh thlau le rethei ngai in Sang Te le a fanu a kawl i a hmu tu, Laitlang an phak tiang ttuanvo a latu le a thlah tu hna a simi Yangon khuasa Falam mino bu sieh, a kapkip in a rak cawlcang i Sang Te le a fanu kong ah a cawlcang mi, bomhnak a petu nan dihlak cungah lawmnak bia chim cawk ko ka ngei. Mai Sang Te le a fanu tuanbia cu thinlung chungah ruah ding tam ngai (interesting) taktak a si ko.
Cu bantuk thiamthiam in AA hriamtlai nih an fir mi hna Chin mi minung 39 zong nizaan ah him tein an rak kir. AA hriamtlai lei nih an rak thlah hna. Lungre thei ngai an umnak hmun in an chuah kehnak khua ah dam tein an rak phak caah Khuami pawl le Pastor nih vok pakhat an thah ve i lunglawmh thlacamnak he sunglawi taktak in an don ve hna. Thla 6 chung AA hriamtlai kut ah harsa taktak in an um hnu ah luatnak an hmuh ve hi asi.AA kut ah a taang mi Chin mi 39 hna nih luatnak an hmuh khawhnak ding ah a kapkip in a cawlcang mi, rian a ttuan mi le rethei ngai in rian a ttuan mi nan dihlak cung zong ah lawmnak chim cawk lo ka ngei. Hi Chin mi 39 hna i an tuanbia, an sining zong hi lungthin ah ruah awk a tam taktak mi (Interesting) ngai a si ve.
Harsatnak khur chung in luatnak a hmu mi pawl, vansang ngai le harsa ngai a um mi minung hna nih luatnak an hun hmuh bak i lunglawmh raithawinak he don, thlacamnak he conglawmh hi Chin miphun nih kan i ngeih mi kan nunphung dawh a si.A tu ahcun Mai Sang Te le afanu zong harsatnak hmun in an chuahkehnak khua ah an phan cang. Cu bantuk in Chin mi 39 hna zong AA kut in an luat i chuahkehnak khua ah him tein an phan ve cang hna. A sinain horthuk chung ah a tla cang mi minung nih a nunnak lamtluan caah a thar in hram domh khawh tthannak ding cu miphun unau, innpa chaktlang ttanpi nak thiamthiam a si herh ko. A ruang cu a tu hin an nunnak catlap thar an ttial thok ve cang lai i an nunnak hrangah a thar in hram an domh ve cang lai.
Credit: thevoicesofmiepi.com
