Salai Lungthlitum: Pohmah 261 remh zong ah CNLD phu nih Chinram cozah an ser khawhnak ding lam a um hme maw?

Ralkap le USDP nih rampi union cozah an ser khawh ti lo ding an theih tikah State le Region ah cozah ser khawhnak ding khua an khan. Chief minister thimnak pohmah 261 remh an timh, State MP hna nih anmah tein chief minister thim si cang seh an ti.State or Region hluttaw ah ralkap nih MP hmun 6 an ngei cia. USDP nih MP 4 tal an tlin ve ahcun MP 10 an si cang. A dang MP 3 an sawm khawh hna ahcun an caah ah state cozah ser khawh a si hnga. Hihi an saduhthah ngan bik cu a si.

 

Ralkap le CianKhanZii thluak cu Chin party ai timi CNLD phu nih an i zumh sual ve, NLD nakin ralkap le USDP nih ‘kan zawn an kan ruat deuh, an kan dawt deuh’ an ti diam. Ralkap nih fawi tuk in an hlen khawh hna.CNLD nih 25% ralkap (MP 6) thumh loin Chinram cozah an ser khawhnak ding lam a um bak lo pohmah 261 remh ko zong ah.

Aruang: Chinram ah MP hmun 24 a um i cozah ser ding ah hmun 13 ngah a hau. Ralkap nih 6 an lak cia caah 18 a tang. 2020 ah Tedim le Tonzang peng MP hmun 4 hi CNLD nih an ngah kho lai lo, 100% a fiang. Cu hmun 4 zuh rih ahcun hmun 14 lawng a tang.Thantlang peng ah USDP in Dr. Hmuh Thang a tling hrimhrim lai. Cucu zuh rih ahcun hmun 13 bak lawng a tang cang. Hi hmun 13 ah CNLD nih a tam bik hmun zeizat an ngah kho te hnga? Tulio cozah a tlaimi NLD le USDP he biaktak tein an i cuh fawn lai. Cozah ser khawh cu chim lo, CNLD nih hmun 5 an ngah khawhnak ding lam hmanh a har ngaimi a si. Cozah an ser khawhnak ding lam a pit 25% ralkap thumh lo ahcun.

 

2015 thimnak ah NLD nih mipi vote in teinak tling taktak an hmuh ko nain MP hmun 12 lawng an ngah khawh, 25% ralkap thumh loin pohmah 261 rak remh cang hna sehlaw teinak tling an ngah ko nain cozah an ser kho lai lo, party dang bawmh an hal a hau ding a rak si. CNLD hi 2020 ah 2015 lio NLD an rak thawn bantuk in a thawng kho ding an si hoi lo.Nain, CNLD nih anmah tein cozah an ser khawh lo zong ah MP tampi an tlin ahcun ralkap le USDP or party dang he i bawmh in cozah ser khawh a si lai(pohmah 261 an remh ahcun). Anmah lawng cun tulio dirhmun in cozah ser khawhnak kutke an ngei rih lo, kan ngei an ti ahcun an lih hrawkhrol in mipi an hlen a si.

Credit: Salai Lungthli Tum

Author: Salai Ephraim