Senthang CDF le Hakha CDF kar buainak cu a zual chin caah thin a phang ngai

CDF vialte kha CDF headquarters (zungchoh) tang ah an rak um dih hmasa. Nain, zungchoh ah a thumi saza tam deuh cu ral tuk ngam ve loin Mizoram le Victoria Camp ah khua an sa. A langpar in ralkap an control hna. Anmah nih phaisa luhchuah an rak tlaih dih fawn.Ral atu mi ralkap nakin ral a tu ve lomi saza pawl power an ngei deuh tikah CDF ralkap an lungtling lo. Hi ruang ah CDF Hakha, CDF Thantlang tibantuk in a dang tein an dir than dih kha a si.

Atu lio phu dang tete an ser ciomi zong hi raltuk a kal ngam ve lomi keimah luala bantuk pawl kha ralbawi bantuk in power an i ngeihter tuk tawn caah a si tiah ka theih.CNA ralbawi cu lakhruak in an rank a kai lo, kum tampi ralram an um hnu ah ralbawi rank an phak a si. CDF ah cun an service caan an i khat dih. Cutikah, luh le cangka in ralbawi tuan ai timmi an tam ahcun a poi ngai ding khi a si.

Senthang CDF le Hakha CDF kar buainak cu a zual chin caah thin a phang ngai, Shan hriamtlai phu pawl Kawl ralkap kap ti loin anmah le anmah an i kap bantuk kan si ve sual lai phan a um tuk. Tedim zong ah zahan kha anmah le anmah an i that cang. Aruang bik cu ZRA nih ‘kanmah dah ti lo hriamtlai phu dang ser a ngah lo’ tiah nawl an chuah ve caah a si.

Kan ral cu MAH a si. Hi fachuaksual doh a duhmi poah nih khawika hmun poah in doh cio ko u. A thawng deuh nih tha der deuhmi kha control i tim hram hlah u, CNF hmanh nih hohmanh an in control hna lo khi. Tanti a herh caan poah ah ‘kan ral ai khat’ timi lungput in tangti hram ko u.

Credit: Salai Lungthli Tum

Author: Salai Ephraim