Sri Lanka Ralhraang Pawl Tuk-kah Nak Kong Ah Myanmar Ai Thlak Ve Cang

Kan hnu cacawn nili nih ah khan Sri Lanka ah ralhraang pawl nih tuk-kah nak an chuahpi. Cucaah minung za renglo nunnak a liam i minung tampi nih hliam an tuar. Cubantuk in thilcang ruang ah Myanmar nih ralhraang pawl mawhchiatnak bia a chim, tiah Foreign Ministry nih Xinhua thawngzamhtu sin ah a chim.

Myanmar President le State counsellor hna nih ralhraang pawl Sri Lanka cawlcangh ning hi mihrut le mah minung hai sa ei hmang bantuk an si, tiah faakpi in mawhchiatnak bia an chim. An chim rihmi cu, cubantuk in Sri Lanka zatlak puicimhnak an tonmi ruang ah hnemhnak bia zong an kuat chih hna.

Cu lang silo in kan hnu Easter Sunday i bomb puah in zatlak puicimhnak an tonmi ruang zong ah khan ngaihchiatpinak le hnemhnak an kuat chih hna. An chim chihmi cu, hibantuk in ralhraang pawl dohnak ah hin Myanmar zong hi zeitikpaoh ah timhcia kan si, tiah an chim chih.

President Vladimir Putin Le Kim Jong Un Summit A Voi Khatnak An Ngei

President Vladimir Putin le North Korea hruaitu Kim Jong Un hna cu a voi khatnak summit an ngei cang. Hi summit an ngeihnak hmun hi Russia’s Far Eastern khuapi Vladivostok ah a si. Summit an ngeihnak ah hin US le North Korea nuclear ralthuam serchuah ngolnak kong hi an ceih bikmi cu a si. University kulhchung ah luh hlan ah kutlaihnak an ngei hmasa.

Kim Jong Un nih hin tutan ah a tharte in pehtlaihnak an ngeih tthan khawhmi nih hin cun caan sau deuh a deih ko lai, tiah ai ruahchan. Vawleipi nih hin Korean Peninsula nuclear kong hi a cuanh in an cuanhmi cu a si. Hi kong he pehtlai in tutan chawnhbiaknak kan ngeihmi nih hin suallam thukpi a ngeih lai kai ruahchan, tiah a chim.

President Vladimir Putin nih, hi chonhbiaknak ah hin Russia nih Korean Peninsula ah rian ttha taktak a ttuan khawh ding hi kan i ruahchan. Ram pahnih karlak ah hin tuah dingmi thil tampi an um. Chawlehthalnak (economics) lei zong ah tthanchonak tamp a chuahpi lai, tiah an zumh.

Ram hruaitu pahnih i chawnhbiaknak ah hin North Korea minung Russia ah ai hlawhmi hna kong hi biapi te in an ceihmi a si. Russia ah North Korea minung ai hlawhmi hi minung 10,000 renglo an um, tiah an chim. Hibantuk in rian a ttuanmi hna pawl hi North Korea phaisa hmuhnak ah a tthahnem ngaingaimi an si. Russia nih hin naite ah khan bawmhnak $25 million bak a pek hna. March thla ah khan wheat 2,000 tonnes bak a peek fawn hna.