Syria Cozah Nih A Mah Kutchuak Missile Bomb In Cyprus Tikulh Khua A Den Than Hoi

Syria cozah nih a mah kutchuak bak te Missile bomb hmang in tuchun ah Cyprus ram a kah lio ah hin, Israel cozah nih Damascus cozah le Hamas cozah hna he an hriamnam konghe pehtlai in RGC Headquarters ah ton bairuahnak a neihpi hna in caan tlawmpal te a hung rauh bak ah Syria nih Syprus khua a kah hi a si i hi ruangah an mah Syria civil minung 4 zong an thih chih ve tiah an chim.

Hi konghe pehtlai in The Syrian Observatory for Human Rights nih a chim ningah cun Syria nih Cyprus ram kah nak ah a hman mi Missile bomb hi Syria cozah nih a sermi a si lo,Russia cozah nih a ser i Syria cozah sin ah an ral hna lak in an ram humhim nak ding caah a pek mi hna a si tiah an chim.cun,Syria nih Cyprus ram a kah nak ruangah Cyprus ram mi minung 15 an thi i a dang minung 6 nih hliamhma an tuar tiah a chim.

Cun, Syrian state media nih a chim ningah cun Syria nih Russia sermi Missile bomb tampi an neih cang caah a tu ah cun Israel ram he biatak tein i doh/tuk dingah t’ih nak an nei ti hna lo i Israel missile bomb a zuang cuahmah lio mi hmanh khi tla lak in kan kah khawh cang lai tiah an chim a ti.Nitlaklei Cyprus ramkulh foreign minister Kudret Ozersay nih cun Syria nih a tu ah kan ram kah nak ah a hman mi Missile hna hi Turkey cozah nih Russia sermi S-200 missile he an rian t’uan ning an i khat bak tiah a chim.

Hi konghe pehtlai in Greek Cypriot military Andreas Pentaras nih a chim ningah cun Turkey nih Russia siam S-200 missile a cawk mi he an i dan nak a um lo.Syria cozah zong nih a thli tein S-200 missile cu a rak cawk ve i a si lai tiah a chim ve.asinain Syria nih Russia ser S-200 missile a cawk bak tiah tehte cu a um rih lo tiah an chim.

Source: BBC

Author: Salai Ephraim