Sagaing ramt’hen a si mi Tamu khuapi chungah khuasa mi Nu pahnih hna nih cun Ritnaksii hmangin chaw an leh ruangah an thliri he an phaisa he kawlram le India ramri a si mi,India ram chung Moe Yi timi khuapi ah tleih an si.mah hna pahnih nih ritnaksii an phurh mi hi a dihlak man ah American dollar million 3.9 man renglo bak a si tiah an chim.
Cun,mah hna Nu pahnih nih an thil tuah mi hna hi ritnaksii lawng si lo in meithal tibantuk hna zong an itelchih.October thla 5 ah khan Moe Yi khuapi chungah inn pakhat an thlan i,cu inn an hlan mi chungah cun an thilri pawl hna cu a thli in an chiah dih na in Asam rifle ralkap le Moe Yi khuapi chung nawlngeitu hna nih thil sining an theih tik ah an inn hlan mi ah cun an rat fuh hna i an thilri cu an zoh piak hna.
Cutik ah an tleih mi hna cu thil t’halo lawngte WY siipia mum 504000, Crystal Ice Myth 15.269Kg, Katamine 2.206Kg le Phensedyl lang 194 bak an chuh hna tiah theih a si.cuhlei ah Nu pahnih hna kut cungah India phaisa 74150 le Myanmar phaisa 49000 an chuh chih fawn hna.hi tibantuk in an va tleih hna lio ah hin an mah Nu pahnih zong cu ritnakssi an rak ri rih fawn tiah an chim.
Hi konghe pehtlai in Tamu Nu pahnih hna nih inn an hlan mi a inn ngeitu Pi Hahat ti mi Nu cu biahalnak an tuah tik ah hi thil a tuahtu hna cu kei mah ka si lo i,Tamu khuami Nu pahnih hna nih an tuah mi a si,kei tu cu zei hmanh kan thei lo tiah The Morung Express nih a chim.cun,atutan ah an tleih mi hna Nu pahnih hna hi a luancia caan ah case a rak ngei bal cang mi hna an si.Kawlram lei in Tamu gate in India ram luh an rak itimh ah ningcang lo in gate hngaktu pawl hna he bia al nak an rak ngei i case rak tuah piak cia mi an si tiah an chim.a sinain a tutan ah zei bantuk in dah biachahnak an tuah piak hna lai ti cu mi zei hmanh nih theih a si rih lo tiah an chim.
Credit:TCJ
