Tuchun vawlei ah ‘sal’ timi cu a um ti loh, ti khawh a si. Cuhmanh ah zauk phung in ai hruaimi ram hna ah cun cubantuk in sal timi cu doh dih cio a si cang. Cubantuk in sal dohnak ah a ngan bik mi US ram ah hibantuk in kum 16 chung rengruang chungkhar pakhat hna nih nu hngakchia pakhat cu sal ah an rak zuat, ti hmuhchuah a si.
Cubantuk in kum 16 chung bak nu hngakchia pakhat sal ah a rak tlaitu Texas nupa hna cu tlaih an si. Mohamed Toure le Denise Cros-Toure, kum 58 veve hna nih hin kum 2000 thok khan hibantuk hin an rak tuah. Nu hngakchia kum 5 minung a simi cu Guinea in US ah rian ttha le phaisa tampi hlawh ding in an rak i hruai. Asinain a hnu deuh ah cun a passport an thuhpiak diam. Cuticun an inn ah sal bantuk in rian an ttuanter i leng chuah zong an sianh loh. A caan ah an vuak. An hrem, a caan ah cun leng vur lak ah zeihmanh i vurh awk ngeilo in an chiah tawn.
Pu Toure hi Guinea’s President hmasa bik Ahmed Sekou Toure fapa a si. Hi hna nupa hi an pahnih in kum 7 chung thong thlak an si hmasa phot lai. Cu pin ah compensation $288,620.24 (£222,702) bak an nupa in cawiter an si fawn rih lai. Hngakchia kum 5 in an rak i laakmi zong cu kum 20 a tling ve cang. Hibantuk in thilsining theih a si khawhnak cu an innpa chakthlang hna bawmhnak thawng in a si.
