Thantlang peng Chin National League for Democracy CNLD party zung hunnak le mizapi he tonbiaruahnak ah rak itel ve hrimhrim mu

Aralaimi August 22 zinglei suimilam 9 in zanlei 4 tiang Thantlang peng Chin National League for Democracy (CNLD) party zung hunnak le mizapi he tonbiaruahnak an tuah lai tiah kan theih.

 

Zung hunnak cu zinglei suimilam 9 in thok a si lai i 10 zanlei 4 tiang in mizapi he tonbiaruahnak a um dih in chuncaw le zanriah dumtinak zong a um chih lai. Hi zung hunnak ah khua chungum he khuate lei tiang nih rak kan telpi cio u” tiah Pu Lal Maung Cung nih a pumpak facebook ah a tar.

 

Mah ni ah CNLD party lutlai hna (CEC) chungin biachimtu zong; Pu Ngai Sak, Pu No Than Kap, Pu Zo Zam, Pu Awm Zaw, Pu Chit Maung, Pu Salai Ceu Bik Thawng, Salai Shing Thun le Mai Sung Zi Mang an si lai tiah kan theih. Atu ban tuk in CNLD party zung cu Chin ramkulh huap in hun timh a si i Kanpetlet, Matupi, Mindat, Falam le Hakha ah zung hunnak an tuah cang tiah the chinland post nih a langhter.

 

Meeting Sawmnak;Thantlang peng Chin miphun hawidawt vialte hna le Chin Miphun party chungtel vialte hna, Thantlang peng Chin Miphun party zung nih nan kut kan nin tlaih hna, Pathian nih nan herh ning cio in Thluachuah inpe cio ko hna seh.Pathian le Chin Mizapi thawng in Chin Party pathum fonh mi Chin Miphun Party (CNLD) cu cozah nih phungning tein hmatpungtin number (116) pek in cohlan a si cang.

 

Cu caah Thantlang peng Chin National League for Democracy (CNLD) zung cu Centre hruaitu CEC upa hna Pu Zo Zam, Pu No Than Kap, Pu Ngai Sak, Salai P P, Salai Sing Thun, Salai Ceu Bik Thawng, Pu Awm Zaw, Pu Chit Maung, Mai Sung Zi Mang, John Khaw Lian Thawng, Salai David hna nih (22.8.2019) nilini zing (9:00) am ah on nak an kan tuah piak lai, cun nazi (10:00) am in mizapi he ton biaruah nak tuah colh a si lai.

 

CNLD zung on nak le meeting tuah nak ah Thantlang khuachung le khuate a hong kho poah rak kan telpi u law bia rak ngai cio uh tiah miphun min in toidor nak le upat nak he kan nin sawm hna.TA/DA pek a um lai lo, lakphak ti ,changreu le zanriah dum ti nak a um lai.

Lal Maung Cung
Chairman CNLD, Thantlang peng

Author: Salai Ephraim