Thantlang Peng Chungah athian Rian Tuantu Pahnih Fak Lak In An Vuak Hna Tiah Theih A Si A Poi Taktak

Chin ramkulh cu Khrihfa ram kan si i a bik in kan mah northern Chin a simi Hakhat, Thantlang le Falam hna hi cu Laimi tiah aa aumi zong kan si, Cu Laimi nih a huap dihmi cu Khrihfa kan sinak zong a si rih, Khrihfa kan si ko kan i ti lio ah a phungmen Khrihfa sinak in cun Pathian pennak chungah luh khawh a si lo i pianthar (Born again) kan timi hi a herh bak caah kan Lairam chungah cun an biakmi kan Pathian nih a bia phuang tu dingah a salnu le salpa pawl a thlah peng hna.

Cun Pathian biaphuan kan ti tik ah hin minung kan si bantuk in kan ei khawh deuh ding in a phuang tu an um bantuk in kan mah le kan zumhnak he aa keih deuh loning in a phuang tu zong cu an um ve ko, a si nain kan Bawipa Jesuh hrim nih cu ti cun va phuang uh, kha ti cun va phuang uh tiah nawl peknak a um lo i Khamhnak thawngtthabia hi vawlei cung khuaza kip ah va phuang uh ti a si caah zei ti an phuan zongah Khamhnak thawngtthabia a si ko ah cun cohlaan ding kan si ko, kan zumh ning he aa tlaak lo belte ah cun i ceih ttihnak (Discussion) zong tuah khawh si ko i na thawngtthabia phuanmi a hmaan lo tiah velh le vuak hna hi cu ttih a nung tuk.

Chin ramkulh Thantlang peng Khuahrang khua ah Pathian thawngtthabia phuangtu Pastor pakhat le Evangelist pakhat hna cu Khuahrang khua tlangval pawl nih zaan pumh an ttin/lawi pah ah lam in an rak bawh hna i faak ngai in an velh hna. Mah Pathian thawngtthabia phuang tu pahnih hna nih hin hlasatu singer pakhat le piangthar kaami pa pakhat kalpi in a luan ciami July 1 (cacawn nikhat ni) ah khan Khuahrang khua ah Pathiang thawngtthabia phuang dingin an phan.

Cacawn nikhat ni zaan in pumhnak an thok i a thaizing in chun cawnnak te zong an nei i cu ti cun Pathian nizan (July ni 7) tiang Pathian thawngtthabia phuannak in caan an hmang. Mah Pathian ni zaan pumhnak in an ttin lio ah Khuahrang tlangval minung 15-20 tluk nih cun an rak bawh hna i an velh hna, pakhat hna hi cu il tlaang cung bak in an thlaak, singer nu le an i tthitmi pa pakhat belte cu zei ti hmanh in an ti hna lo.

Mah zaan i an velh chap hna leengah thazing zong ah lam in kan in bawh rih hna lai an ti caah khuadei tiang hmanh um ngam ti loin zinglei suimilam pakhat (1:00AM) tluk ah Khuahrang khua in Hakha lei ah an tlung. Hi thawngpaang hi kei mah nih phuah chommi a si lo i a dikmi bak a si, theih a duh bakmi nan um ah cun hi ni le caan ah Khuahrang khua ah ho ni dah Pathiang thawngtthabia a phuan timi rak sulhhlat ulaw nan theih khawh cio ko lai.

Credit: bellereuel website