Theihtlei: Ramkhel thlihran ruangah Chin party MP hna nih cunglei centre zoh lo in ram le miphun caah an tuah khawhmi hna

Ramkhel thlihran ruangah Chin party MP hna nih cunglei centre zoh hau lo bak in kan khua kan ram kan miphun caah kan tuah khawh mi Langhter ahauh caah ka vun tial ve cang hna lai.Thantlang peng cankarlak thimnak ah siseh, Kanpalet cankarlak thimnak ah siseh party dang hna nih Chin (lai) party nih cozah zong nan tlai kho lo, nan MP hna zong nih zeihmanh an tuah kho lo tihi an biatlaih a si. Khuapi um hna nih cun an theih thiam nain khuate le ramleng acheu nih an zumh ve tawn. Thantlang peng 2010 thimnak ah CNP (lai) party nih ahmun li ning in teinak kan hmuh i kum nga chung kan si khawh chung in Thantlang peng caah le Chinram, Chin miphun caah chim le tuan kan rak i zuam.

Keimah zong hluttaw speaker ka rak i zuam i USDP le ralkap MP an tang ti i mee(14), mee (10) in ka rak sung ralkap MP umlo ahcun fawi tein rak tei ding a si. Sihmanh sehlaw Chinram le Chin Miphun caah siseh, Thantlang peng caah siseh ka si khawh chung in ka rak cim ka rak rel ve i Chin pine MP vialte lak ah biachim bik MP ka rak si. Cu chung in kan chim khawh mi pawl party dang nih an theih khawh ding le kan mipi zong nih nan theih khawh ve dingah a biapi deuh mi tlawm pal in ka vun langhter hna lai, mah hi hi phorhlawt min than duh ruangah si loin saupi chim lo in kan um ko nain kan ramkhel thil hran athat lo caah ka vun chim tial mi a si.(2010-2015) tiang Hluttaw ah budget kong, thancho nak kong budget a rak hal a rak caih kho Chin party CNP MP lawng kan rak si.

Thantlang peng ca keimah hal mi pawl abiapi deuh ka vun langhter hmasa lai. Tutan ah Thantlang khua hel lam kong le khua chung lam kauh nak kong a si lai. Thantlang khuahel lam hi avoi (9) nak can hman hluttaw meeting ah atang ka tar bantuk in hal nak ka tuah. Mah hlan zongah cabinet meeting zongah voi tampi kan herh nak kong ka chim, budget a tlawm tuk lio asi i pek an rak in harh ngai, ting 800 kan in pek lai anti an ka pe hlei lo.Cu lio lam vuanci hi aleng khanh mi Pu Ngun San Aung asi i na lungdong hlah hal chih peng ko pyitaungsu lam ah vuancichoh Pu Hung Ngai hi chim law kan zuam piak lai ati i he ka rak i zuam ve i pyitaungsu lam ah an cohlan in budget an ka pek nak a si, Pu Ngun San Aung cungah kai lawm ngai ngai.

(2015-2016) budget ah million 500 (ting 5000) le (2016-2017) ah budget ah million 705 (ting 7050) pek in tuan mi a si. Khuahel lam laipawng lung in nichuah nitlak lungler lam chuah tiang adot zong ah Lamzung riantuan tu Pu Dal, Pu Tin Peng, Ko Lat le Nepyidaw in ahong mi hna he kan rak dot mi a si.Cun Thantlang khuachung lam abituk mi kauh nak le minung kal nak congress lam zong keimah hal mi a si i ka hal nak le a budget zong atangah ka tar chih ko hih. Million 382 (ting 3820) budget pek in tuan mi asi, khuachung lam kauh ding tah le lam kam in pawl hnu pil ding zoh zong ah ​ khua nu khua pa le lamzung he kan rak nawl hna. Asau deuh caah hnu ah adang zong ka vun langhter rih hna lai.

Note: mah hi capar hi Lal Maung Cung Cinzah nih a t’ial nak caan a sau cang na in theihtlei ngaingai ah ka ruah caah a thar in ka vun langhter t’han mi tu a si.

Credit:Lal Maung Cung Cinzah 

Author: Salai Ephraim