Chin Human Right Organization “CHRO”nih a chim ningah cun Thlanglei Laitlang,Paletwa ramkulh chung Kalin khuami hna mi nung 52 hna cu an tlau ni in a tu tiang an um nak theih a si rihlo caah an chungkhar hna lungretheih taktak in khua an sa tiah an chim.CHRO nih mah bantuk tawngzamhnak a tuah mi hna hi a luan cia Feb thla lio ah AA hriam tlai pawl hna nih an rak tlaih mi hna kha an si.
Kalin khuami Pu Kan Aung nih a chim ningah cun khual ka tlawn karlak ah ka Nupi le ka Fa le minung 6 hna zong AA pawl hna nih an rak tleih ve hna,hi thawngpang ka theih in ka khual tlawn nak in ka rak tlung i,ka lung a fah tuk ah zei ti um awk zong ka hngal lo,an tlaih hna i tu ni tiang ah cun thla 4 le ti hrawng a rau cang.a thih le an nun zong zei hmanh theih khawh an si lo.kan lungretheih in kan thih phah cang lai tiah a chim.
Cun AA hriam tlai pawl hna nih Feb thla lio ah Kalin khuami minung 52 an tleih hna lio ah hin Rakhine ramkulh Khamaung khuami hna zong minung 80 bak an tleih chih hna na in Khamaung khuami hna cu an thlah cang hna tiah theih a si.asinain thlanglei Lai thlang, Kalin khuami an tleih mi hna belte cu a tu tiang an sining theih a si rihlo tiah an chim.
Cun Pu Kan Aung nih a chim chap mi cu AA pawl hna nih ka nau pa Pu Kyaw Thein cu an rak tleih bal cang i,AA kut in a rak zam khawh tik ah a rak tlung in a Nupi sin a phanh tik ah cun a thluak a hman ti lo tik ah Nupi cu a kut le a kee a tan pin ah a mah chungchuak a Fa nu cu a thah.cu tik ah a mah zohkhenh nak ding caah cun Paletwa Charity Group pawl hna nih kawl ram ting 2 an bawmh.Pu Kyaw Thein nih a chungkhar cungah a tuah bantuk in midang cungah a tuah t’han sual lai ti phan ruangah a tu hi Paletwa palik station ah chiah a si tiah a chim.
Cun a tu hi an tleih mi hna 52 hna cu Bangladesh le Myanmar ramri ah a um mi AA sakhan ah chiah an si i AA nih khua leng chuah an senh hna lo ruangah a si men lai tiah CHRO nih cun a chim.
Credit: Chin Human Right Organization
