Trump Konghe Pehtlai In Tuchun Ah Minu Pakhat Nih Pathian He An Iton Nak Kong A Chim Mi Cu Khuaruahhar Ngai A Si

Hi nu vision hmuhmi hi rak ngai cio u, mirang holh ai harh deuhmi caah Laiholh in )Hello! Nan dam hna maw? Amanda ka si.Online in Devotion tete ka share ton. Tu chun ah Bawipa he hawikomhnak ka ngei i Thlarau in vision ka hmuhmi share kan duh hna. Ahmasabik cem ah chim ka duhmi cu Trump a ttanhtu (supporter) ka si bal lo. Trump biachim mi pawl hi ka hnasen a tla bal lo. A biachim holhrel ka ngaih ah mi ruamkai, mi phorhlaw asi tiin ka hmuh i a ka neng tuk, huatnak ka ngei. Tuan deuh election ah khan Clinton a ttanhmi ka rak si. Sinain kai thleng cang.A tu hi keimah pumpak hmuhning le ruahnak kan chimhmi hna asi lo. Thla ka cam i ka hmuhtonmi kong asi. Bawipa sinah toidor tein thla ka cam i ka hal. Bawipa President caah Trump le Biden kong ah na hmuhning le ruahnak zeidah asi? Zei ruang lo ah mi huat ka ngeih hi ka duh lo. Nangmah thimmi le tinhmi kalh hna in kan um sual maw? Zaangfahnak in hong ka chim ko tiah thla ka cam. Thiangthlarau nih a ka pawl i hmun nuam ngai ah khin Bawipa Jesuh turun he an um lio khi ka hmuh. Bawipa Trump le Biden kongah na ruahnak hong ka chim tuah tiah ka nawl. Thlarau nih hmuhnak (viosion) a ka pekmi cu phun thum in asi.

 

1.President Trump khi suite he ai thuam i hallway saupi ah amah lawng khua dang hoi loin a kal lio ka hmuh. Ka thinlung in zaangfahnak nganpi ka ngei. Umhar lileng, bawmtu ngeilo, ngaihchia ngaiin a um khi ka hmuh. Cu lio ahcun leidip khi thli nih a hun hranh i a tom in a hung zuang. Ruahphak loah leidip cu muvanlai (Eagle) ah a hun i cang. Muvanlai nih cun rul kha a hei zuan hnawh i a tin in a cawi kha ka hmuh.

 

 

2.Cun, Joe Biden ka hun hmuh. A sam a rang i mil- tleu ngai in ai hriat i suite dawh ngaimi ai hruk. Interview tuahnak room bantuk ah khin bia a chim cuahmah lio ka hmuh. A ka in a ttemi rul lei bantuk khi zukzuk tiah a hung chuakmi ka hmuh. A pawng ah mi tampi an um nain rul lei cu an hmu lo, keimah lawng nih ka hmuh.

 

3.Ka umnak hmun cu thingkung um lonak, ram rocar, lung tam hmun thetse ram bantuk khi a si. Cakei nganpi nih sa seh ding a dawi khi ka hmuh. A hnuah seh a timhmi cu keimah ka si ka hngalh, cakei nih seh ding in a dawimi sakhi bantuk khi ka si, ka ttih tuk. Thingphang thlalau in ka um lioah cung lei khi ka hun zoh i Chaindeih (lion) nganpi ka hmuh. Cu chiandeih nih cun Cakei (pawpi) cu a zuan hnawh i a tlaih i a kalpi.

 

 

Ka vision hmuhmi ka ruah tikah President Trump kong i ka lungput le ruahnak ka rak ngeihmi ka palh ti ka hun hngalh. Zei ruangah dah a si hnga? President Obama zong ka hua lo, Clinton le Joe Biden cung zongah huatnak ka ngei lo. Trump tu cu ka rem lo i, ka lungthin ah huatnak ai tuh.Mi cheu nih an chim bantuk in Trump hi Pathian minung ngai cun ka hmu lo. Sinain Pathian nih a thimmi cu a rak si. Mi sawsawh cio bantuk a si ko. Chambaunak tampi a ngei ve ko. Vision ka hmuh bang leidip sawh a si ve ko. Mi zapi hi leidip lawng te kan si. Sinain cu leidip cu Pathian nih a tthawngmi lei ai dawhmi muvanlai ah a ser khawh ko ti hi asi. President Trump hnulei ah khin tthawnak nganpi a um.

 

 

Atu lio hi President caah thla kan campiak ngai a herh. Bawipa nih a thinlung a hnemh nakhnga, lungdong in a um sual nakhnga lo le Minung bochan loin Pathian ai bochan khawh nakhnga; Cun Bawipa Jesuh he an iton taktak i Khrih nun a ngeih khawh taktak dingah thla campiak usih. Vice President hlun Joe Biden zong a phen ah rul thlarau, thlarau thur nih a ttemttawn nak in a luat i Pathian ai bochan nakhnga thla cam piak usih. Cun hnu cem ka hmuhmi ka vision bantuk in Zumtu Khrihfa hi huat le dodal, hrem kan tong chin lai. Pawpi nih seh dingah a dawimi sakhi bantuk in zumtu kan cungah thil a um te lai. Beidong loin cunglei zoh in Bawi taktak, bawi vialte Bawipa zoh in nung hna usih.

 

 

Hihi nan tinglung thlen timhnak caah ka ruahnak ka chimmi a si lo. Kei cu citizen zong ka si lo i vote pe kho zong ka si lo. Ka thlacamnak i ka hmuhtonmi te kan chimhmi hna asi. Keimah bantuk in nan ruah ciami le hmuh ton ning kha chia ta law lung thiang tein Bawipa ruahnak hal ve u. Midang chimmi le meidia thanhmi ah si loin nanmah tein Bawipa ruahnak hal cio u. Na ruahnak le ka ruahnak cu van le vawlei an i sanhleih bantuk khi a si a titu Bawipa hmaiah toidor tein hal cio u. Kei zong nanmah bantuk cio te ka si ve. Pathian hmun thiang luhnak nawl ngeimi kan si dih. Nangmah hmuh ning lawngah i hngat hlah. Midang le media chimmi zongah i hngat hlah. Bawipa ruahnak hal cio u. Hi kong ka share mi hi mi tampi nih ruahnak chia he zeizei tiin bad comment tampi ka hmuh lai ti zong ka hngalh ko. Zeipoah si seh tiin raltha in kan share mi hna asi. Thlacamnak in ka bia ka donghter lai……

A lehtu- Salai Bawiukthang Cinzah