Trump Nih A Pomh Lai Maw A Sungh Dah A Khan Cang Lai

Nai hrawng cu catial ka zuam lo ngai nain thil sining a vun lang chin lengmang i daite in um a vun har ngai. Cucaah ka tlangtar hi tawite in ka vun tial tuah lai.US politics hi mirum pawl le politician pawl nih fak tuk in an thurhnomh cang tikah President a rak tlin hlan in Trump nih a chimmi cu ‘Washington hnawmthur vialte kan thianh dih lai’ a rak ti.2020 campaign an tuah a dongh zan i Michigan ah VP Mike Pence nih capo biaktak in ‘Washington thurhnomhnak hi kan rak ruahnak naak in a rak thuk deuh, asinain kan thianh dih hrim lai’ tiah a nih pah in a chim.Zeitluk in dah US politics hi thurhnomhnak nih a zelh cang timi cu el awk a tha ti lo. A zual tuk ngamsam cang. Cucu Trump nih term khat a tuan chungah a thianh tawk cu a thianh nain a chung in a rak fek i a thuk tuk cang.President a tuan kaa in Russia hoax in an tuai lengmang i a hnuah cun impeachment ah an lut. Trump huatnak lih le hrokhrol cu a phunphun in tehte cu an auh hna i, a hohmanh nih an zum hna lo zeicatiah Trump sualnak le Russia he pehtlaihnak a ngeihmi an langhter kho lo.A hnuah ah cun anmah Democrats pawl hrokhrolnak vialte tu a vun lang dih lehlam. Pi Clinton nih a email thangchiatnak a tonmi phihkharnak caah a hrokhrol in Trump le Russia pehtlaihnak a rak chuahtermi tu a rak si diam!. Hrokhrol in Trump cu sual a puh i hlathlainak a tuahter hna. Trump a hua ngaimi CIA director thing John Brenan nih Obama sinah a rak chim. Cuticun an dawng tein Trump cu tuaitam hram an thok.Khatlei in Liberal media pawl nih Trump chiatnak lawng te cu ni fatin an chim. House democrats pawl nih a rian phuah an rak i zuam lioah media nih lih le hrokhrol thawngpang cu dong loin an rak vorh chih ve.Tha tein US politics a dawimi nih cun ni fatin in mit le hmaika hram i Trump an dohning hmuh peng cu celhpiak a si lo ngai. An dohning le an huatning tilian a ngan kho tuk. A chungkhar nih celh ding zong a si lo; Trump ca zong ah celh ding a si lo.

 

Rak thla kho hna seh law kedan le pahnat hnawhnak puanchia tluk hmanh ah an chia lai lo. President min le a tuanbia cu a um bal lo bantukin an hloh dih cikcek lai. Indian pa prophet an timi pa hna nih cun “Trump hi hmuh lo naak ahcun a tuar tuk ko. Pathian sinah thla a cam lengmang” a ti.A sullam cu lenglei mipi mit hmuh ahcun a zei poi lo nain a chung cun a rak tuar bak ve ko ti a lang.Russia hoax in an tei ti lo hnu cun tluang tein a rian a tuan cang lai tiah kan ruah. Media pawl zong an lihchim le an hrokhrol vialte mual a pho cang i ningzah seiku khat he an daideuh cang lai kan ti lioah Russia hoax tilian naak in a let in a rak ngan deuh chinchinmi lih le hrokhrol fa an rak pawi than rih.Mah tluk tiangtiang in rian an rak tuan than lai ti hi aho hmanh nih kan ruat lo. Trump cozah zong nih an ruat lai lo. Kan rak ruahmi tu cu mail in vote thlak cu lih le hrokhrolnak a tam lai ti hi a rak si. House speaker Nancy Pelosi nih a chuah pi ah khan Trump nih fak tuk in a duh lo naak zong a rak langhter.Virus ruang le a dangdang ruang ah a lan thai. Atu cun mail in vote thlak lawng si ti loin a him lo taktakmi voting software le system zong an rak luh pi chih. Dominion voting software hi US battle ground states pawl an cawkter hna ah hin a thli in tangka in zik a nawh hna ti a si.Vote an rel lio a siah an thlak lio a siah ramdang in rak theih khawh a si. Voting system number zong hi duhning poah in third party leiin remh i thlen khawh a si. Zeitluk in dah bochan awk a that lo hi a manual hrimhrim in theih khawh a si tiah software thiam nih an chim.

 

Dominion software hrimhrim hi comunist ram Venezuala ram chuak a si an ti. Hrokhrol aa timmi ram poah nih an hmanmi voting system zong a si tiah Trump legal team Sidney Powell nih a chim. Zeitluk in dah an hrokhrol timi a chim hrimhrim ahcun a thihung kho tuk.States 30 hrawng nih an hman i an i cuh bikmi states pawl zong nih an an hman. A hramthok tein an rak hman ding hrimhrim si lo. A hmangmi states poah cu federal crime sual puh in hlat awk hrimhrim a si, a si lo hmanh ah software a cawtu officers poah cu federal crime sual khawl an hau tiah a chim chih.Hi tiang lawng si loin globalist agenda aa tlaihmi vawleicung mi rum le mi lian pawl zong an i tel hna tiah zumh an si. Hi chungah US mirum George Soros aa tel tiah an zumh. Powell nih a chim thanmi cu ‘vawleicung mirum le mi lianlian nih team fate an kan doh cuahmah lio a si, asinain kan tih naisai hna lo’ a ti.Trump cu “America agenda first’ a ti i golobal agenda kha a kal tak tikah vawleicung mirum, ram le bu le riantuanak tam tuk a hnursuan. Mah ruangah 2020 thimnak ah hin Trump thlaknak ah direct in a siah indirect in a siah an i tel len hna.Cucaah vote reltu minung an fir le an hrokhrolnak cu an lang thlushmah ko cang hna i tampi chim a hau ti lo. An lang thluahmah fawn ko rih lai. Trump legal team nih tehte tam tuk an ngei cang hna.Biahal ding a ummi tu cu Trump nih a sungh a khang lai maw ti hi a si. Atu lio Trump dirhmun cu a har taktak. Fair tein Biden nih a teimi cu si seh law ka sung tiah Biden sinah sunghkhannak a chim cang lai. Asinain a sung lo.

 

A vote an fir i Biden kuang ah an bungpiak dih tu khi a si. Republican pa bik pakhat nih a chimmi cu ‘zeitin dah American mipi nih a vote lomi cu kan president kan ti khawh lai’? a ti. Trump legal team pawl zong nih “Trump nih landslide in a tei. Kan ngol naisai lai lo. Zalonnak caah Trump a vote tu American mipi sinah teinak kan chuah pi hrim lai” tiah fak ngai in an chim.A legal team zong an lung a thawng tuk. Trump nih a vun tialmi cu “ka legal team pawl nih hrokhrolnak vote le tehte an hmuh chin lengmang lioah Joe Biden nih le a ran khawh chung rang in Cozah riantuan upa pawl a au tluahmah ve. Kan biaceihnak nih dingfel tein a kan zohpiak te ko lai tiah ka zumh. Vawlei nih a kan cuanh cuahmah ko” tiah a tweet.Tehte tam tuk an ngei cang i sunghkhan cu an tim lai lo. Thurhnomhnak ka thian lai ti lio i a mit le a hmaika ah khat thup in a vun i pong than komi vun hrial ko ding le sungh pek ding cu Trump caah a har ko lai.Hal ding a ummi cu a legal team nih teinak an chuah pi kho lai maw? An chuah pi khawh ahcun ‘thonginn ah na kal lai’ tiah Pi Clinton a rak timi kha bia lawng si ti loin a tak in a tuah cang lai maw? An sungh sual ahcun Trump nih sungh a khan hau cang, nain a khaang kho lai maw?A khaan ahcun media in a siah politician in an siah hollywood leiin an siah zeitin dah Trump an hmuh lai? An dai cang lai maw? Hloh cikcekdah an duh lai? A biapi cem in, sualnak le palhnak um loin hi tluk in an rak doh i, a donghnak ni tiang ah lih le hrokhrol le fir in an dohmi hi daite in inn ah aa tin pi ko hna lai maw?Zei poah a chuah ah chuak seh tiah a fight lai maw? Thil sining cuan ko rih tuah hna u sih!

Catialtu: Luther Tin Hre