Tu Lio Kawl Ram Buabainak Ruangah Khrifabu Nih Lainawnnak Meithal Kan Cawk Piak Hna Awk A Si Maw

A phi cu Khrihfabu nih din lonak hi a doh awk a si maw? timi nih a fianter. Democracy ram ahcun meithal loin doh khawh a si. Ralkap hramhram ukmi ram bel ahcun Last resource ah meithal loin lam dang a um ti lo. Kan pale Rev. Dr. S. Hre Kio, Rev. Dr. C. Duh Kam le. Rev. Dr. Denis Shu Maung hna zong nih hihi an dirpimi a si ve (Interview le pumpak biaruahnak ah an chimmi, ka theih palh lo ahcun).

 

 

Mah caah Federal Army ser caan a phak ahcun kan Khrihfabu cio timhcia in um hna u sih. Pumpak thawhnak lawng i rinh hlah u sih. Kan dohmi ral cu kum 60 leng dinlonak system in mitampi nunnak a hrawktu ralkap thluak ngeilo an si. Thluak ngei lo cu nemnak in chimh kha thazang a dermi ah an ruah. Mah caah Pathian dinnak thawngtha cu dinlonak nih kum 60 leng a hrenh khumh cangmi hna innka a boh piaktu a si. Cucu nihin kan mission ngan tlawk awk le a hnu deuh ah ti awk a tha ti lomi rian a si. Crd: Peng ling

 

 

Bialehnak By Peter Lian : Ruahnak i dan phung a si caah na ka theihthiam lai ka zumh. Zalong ten ka hmuh ning ka chim ve lai mu. Tawi deuh in chim khawh kaa zuam lai. “Meithal cawknak ah Khrihfa bu chaw kan hman awk a si maw?” ti mi biahalnak ”Khrihfabu nih dinlonak a doh awk a si maw?” ti mi nih a fianter, na ti mi hi kaa hrawm kho deuh lo. Zeicahtiah, cu nih a sawh mi cu, Khrihfabu cu dinlonak dotu bu a si ko caah Khrihfabu phaisa cu meithal cawknak ah kan hman bak awk a si ko, ti khi a si. Kei nih cun ”Khrihfa chaw” le ”Khrihfabu chaw” hi ka danter deuh. “Khrihfa chaw” in meithal cawk tu cu al awk a um lo. Atu na chim mi khi ”Khrihfabu” i, kan thawhlawm, cheuhra cheukhat, mission ca, CE ah, tbk i kan pek mi chaw khi a si rua. Hi hi na ti duh mi a si ahcun ka hmuh ning aa dang deuh ngai.

 

 

Naa cherhchan mi Rev. Dr. SHK, Rev. Dr. C. DK le Rev. Dr. DSM ti pawl cu Laimi nih kan i bochan tuk mi le kan upat tuk mi kan pale an si. Anmah nih an ruah cikcek hnu i an chim mi cu a sawhsawh cu a si lai lo. Ka ruah khawh lo mi a ruat khotu le ka theih lo mi thil tampi a thei mi an si. Ka ngakchiat ten atu tiang ka upat tuk mi lawngte an si. Nain atu kong ahcun ka hmuh ning le an hmuh ning aa dang bak tinak a si. A poinak cu um lo mu. Ruahnak aa dang ti bia sawh.

 

 

Ka hmuh ning ah cun, kan miphun le kan ram nih emergency in meithal cawk a herh tuk cang, ti a si ahcun a herh ning in khua kip le sang kip tu ah phaisa khawlh awk a si ka ti. Khrihfa ka si caah/Pastor ka si caah meithal cawknak ah ka chaw ka pe kho lo, ti tu cu ka pom ve lo. Miphun le ram vennak caah a herh, ti ahcun kan si khawh tawk kan thawh cio awk a si ko. Nain, Khrihfabu i kan pek mi chaw cu Khrihfabu a cawlcangh khawh nakding ah hman awk a si ko ka ti. A rengreng ah Khrihfabu chaw thengtheng khi va hman hau in ka hmu lo. Chungkhar le pumpak cio in thawh khawh tuk ding a si ko. Cucaah, Federal Army ca a si ah, zei bu ca a si ah, ”meithal cawknak” theng i Khrihfabu pbaisa lei i ready hauh cu ka pom kho rih lo. Chungkhar le pumpak tu hi a herh ning in thawh ding ah i ready deuh hna u sih. Khrihfabu ta cu a dang deuh in ruat ko hna u sih law zei dah lawh hnga? Kaa lawm mu.

 

Notes: 1. Kei hi Khrihfabu ah caan tling rianțuan ka si lo mu. Khrihfabu phaisa a siang lo mi ah ruah sual lo ding. 2. Hi kong he pehtlai in personal chat box zong ah tlamtling deuh in i ruah khawh si (chim awk a tam lengluang). Crd: Peter Lian