Lai Mi vialte nih theih aherh ngai tiah ka ruah caah siaherh nak he ka van tial.Online/Meivan hi Lai mi nih kan hman hlan ahcun kanmah umnak pawngkam thawnpang lawng kan rak theih khawh caah pumpak kan sining, kan fim le hruh tbt. kongah zeihmanh mipi theih awk in mualpho khawh arak si lem lo. Mahbelte Online/Meivan kan van hman le cangka in thil sining tampi a van i thleng ve colh.
Online/Meivan timi cu mipi he pehtlaihnak le thawngpang theihnak caah asi bantuk in hmanzia thiam hi a herh colh ve. A fawinak chim ahcun meivan ahhin Website, Facebook, Email, Viber, Gtalk, WhatsApp, Messenger.aphunphun hman asi. Mah hna lak ah Facebook hi phundang te asi i Minung pumpak sining kha mikip theihkhawhnak dingin phozar nak asi i mi tambik nih hman cemmi zong asi fawn. Zeicatiah minung pumpak a sining vialte kha minute pakhat chungah mikip hmuh khawh awk in alangh khawh dih caah an duh cio nak asi. Cucaah Facebook hi minung pumpak, chungkhar, Khrihfa Bu le Community caah dirhmun le sining langhter tu asi.
A hmanthiam mi caah cun minthan nak le sunparnak ah a can bang hmanthiam lo cun mitthep ah minchiatnak le mualpho nak ah a cang.A hmanthiam mi caah cun Nupi pasal thatha ngeih khawhnak asi lioah a hmanthiam lo mi caah cun ai daw mi nu le va cia ithen nak le semmawng rual mitthli tlak nak ah a cang ve hoi.A hman zia thiam mi caah cun miaknak le rumnak ah acan lioah hmanthiam lo caah cun zatlak puicimh nak le lungretheih nak chuahter tu asi than ve.Mifim le a hmanthiam caah cun hawikom tha ihmuh ton nak le a sinain hmanthiam lo mihrut caah cun hawikom tha cia he bia kakhat ruangah huatnak le then nak a chuahter tu asi ve hoi.Online riantuan ziathiam mi caah cun thancho nak ah acan lioah khuaruah thiam lo le daithlang tluartlap in a um mi caah cun zatlak puicimh nak tumchuk nak ah acing fawn.
Khuaruah thiam mi caah cun fimnak ah an hman lioah mi tampi caahcun hruh chin nak le mah hruh mual i phohnak ah acang ve fawn.Mitampi caah chungkhar dawtnak a chuahter lioah mizeimaw caahcun chungkhar buainak le mitthli tlak nak a chuahter ve fawn.A hman ziathiam mi caah zan ih hmu thawtnak le hla in i hlawinak ah a can lioah hmanzia thiam lo tampi caah cun mi he sik nak le zan ih khawh lo nak ah a cang fawn.A hman zia thiam mi caah cun pumsa ngandam nak le sersiam nak caah an hman lioah a ruat thiam lo caah cun pumsa hrawknak le zawtfahnak tiang ah a cang tawn.Mifim caah an fimnak langhter chin tu asi lioah mihrut caah cun hrut phozar nak asi ve fawn. An catial zohbak in mifim le mihrut theihthiam khawh colh an si.
Cun Facebook zoh hi Ar nih sahngar mei a hmuh he ko ai lo. Tih a nun nak theih cuahmah ko bu ah sia a herh peng i bih zoh peng duh asi. Cucaah ralrin a herh ko. Theih aherh ngai mi cu, fim na duh ahcun Ca Uk va rel deuh cu asi lole google chung i mifim pawl tial mi tukhi rel deuh. Cucu na caah thancho nak asi deuh lai. Zeicatiah mifim le mi pical poh cu Facebook ah an lang tuk lem lo. Ngapi cu Tili thuk ah a tlon bang mifim cu Ca Uk chungah an um deuh. A cancan te lawngah Facebook ahcun an lang tawn. Facebook chung alang peng mi hi cu Tiva kam ah a tlongmi nga te le burbuluk deuh an sitawn. Cu bantuk tialmi rel lengmang cu hruh chin afawi te pin ah thinlung hrawhral nak zong a tam fawn. Zeicatiah Facebook chung catial mi poh hi na theih cia bang nangmah nak fim hlei an um lai lo, nangmah tluk le nangmah nak hrut deuh lawng te an si ti cu na theih ko. Cuhna sin in na theih khawh mi le nai lak khawh mi cu thancho nak si loin lung retheih nak le buainak deuh tu asi lai.
Media Kong:Khatleikap ah Media a sawisel tu zong um asi. Media sullam hi theih ahau. Media cu phunglam te a ngeimi an si ve. Mi nih theih an duh mi le thawngpang theih tlei poh a kawl i thlah tu an si kha theih fian a hau. Thawngpang dik le diklo hlat caan an ngei lo, thawngpang thar poh an theih ningin direct in tial tu an si. Sual phawt awk an tha lo. An rian asi. Pumpak kong bel ah serious in an ipalhnak a um sual i an ngeihthiam khawh hna lo ahcun a herhning in an ti ve hna. Cucaah thlauh nak nawl na ngei hna lo. Na duh lo asi ahcun an ca kha rel hlah law cucu nangmah right asi ve. Mi tampi nih an rel lo ahcun mah Media kha a dih ve te ko la. Cucu thil kal hmang asi.Cucaah fim na duh ahcun Ca Uk tialmi tukha rel zeicatiah mifim nih ca tampi a rel hnu le khua tampi a ruah hnu le thil tampi a ton hnu ah a tial mi asi caah fim nak an pek lai. Na nak hrut nih a tial mi Facebook lawng na rel lengmang ahcun fimnak i chap loin na nun tu a buai kho.
Biatlang kawmnak:A tu kan chan cu fimchan le chantha kan ti ko nain hmanthiam lo ahcun kan nunnak asi mi rawl hmanh hi mitampi caah thihnak ah a can tawn bantuk in Online timi hi a hman ziathiam lo ahcun mualpho cikcek nak le hrawknak asi timi hi philh lo ah a tha. Cucaah mitampi nih online hi an ifim pi lio le thancho pi lioah nang le kei nih kan i hruhpi le buaipi sual ahcun a poituk ding asi. Rawlthaw ai ei sual i a thi mi bantuk kan si sual lai. Thiltha zeibantuk poh hi hmanthiam ahcun thatnak ah a cang i hmanzia thiam lo ahcun zeibantuk thiltha zong hi buainak le thihnak tiang chuahter tu an sitawn.
Credit: Van Bawi Kam Zaitu,US
