Tuchun Ah Indian Security Forces Le Ralhrang Pawl Cu Ceilak An I Kap Than Hoi

May 16.2019 zing ka teah khan Pulwama district chung Jammu and Kashmir security forces pawl hna cu Dolipora khua an um cuahmah lio ah ralhrang Jaish-e-Mohammad group hna nih an kah hna i,Indian ralkap pawl hna zawng nih khuapi chungah cun an kah ve hna i ralhrang minung pathum an thah khawh hna i Indian ralkap minung pakhat cu ralhrang lei nih an thah ve tiah tual chung palik nih an chim.

Pakistan ralhrang Jaish-e- Mohammad photo.

Cun tuzing i Indian ralkap a rak kaptu hna hi US cozah nih vawlei cung ralhrang lak ah (Black list) ah nai te i a chiah mi Pakistan ralhrang Jaish-e- Mohammad groups pawl kha an si tiah an chim.

 

Indian ralkap le hi ralhrang pawl an i kah nak hi Indian cozah nih ralhrang pawl hna kong he pehtlai in thawngpang a dawn caah a cozah nih cun Central Reserve Police (CRPF) pawl hna le Rashtriya Rifles ralkap pawl hna cu cei lak te a kuat hna i Dolipora khua ah an i kah hi a si tiah an chim.

 

 

Cun Indian ralkap le Ralhrang pawl an i kah lio ah hin Indian cozah cungah a lung a tling lo mi Dolipora khua mi tampi hna nih cun Indian ralkap pawl hna hi thing le lung hmang in biatak tein an cheh len ve hna i Indian ralkap a thi tiah an chim mi hi Ralhrang nih an kah nak in a thi mi maw a si? mipi hna cheh nak in dah a thi mi a si tiah bia fiang taktak a um lo i,a thih nak kongah bia tampi a chuak tiah an chim.

Jammu and Kashmir security forces pawl hna photo.

 

Hi thil a cang mi konghe pehtlai in Pulwama khua chungah a um mi hna mobile internet service dawr vialte hna cu kharter dih an si pin ah an i kah lio muicawl video pawl hna cu mi zei hmanh nih download kho lo dingin mobile internet speed cu tlawn te lawng in an nunter tiah an chim.

 

Source: Hindustantimes

Author: Salai Ephraim