Tuchun Ah Rev Piang Bik Cu Covid Zawt Nak In Hakha Sii Inn Ah Mual A Liam

Ramthlo khua AG Pastor COVID-19 in mual a liam.Falam Peng Ramthlo khua AG Khrihfabu ah riantuan lio mi Rev. Piang Bik cu COVID-19 in June 12, 4:00 am, Hakha sii-inn ah mual a liam, a ruak cu Ramthlo khua ah an vuicolh, tiah kan theih. “Amah hi zarh khat renglo deuh hrawng a zaw. June 11 zaanlei ah khan Hakha sii-inn ah an kalpi i atu bantuk in a nunnak thaw a dih hi a si.

 

A ruak cu inn ah suang loin thlaan ah an vuicolh ko,” tiah khuami pakhat nih a chim. Rev. Piang Bik nih a nupi, a fanu 2 le fapa 3 a taantak hna. Chin Ramkulh huap in June 12, 10:00 AM tiang ah COVID-19 in minung 481 an zaw i minung 13 mual an liam cang, tiah kan theih.

 


June 11 zaan ah Kalay (Waibula lam) in Hakha ah SAC ralkap motor 6 a phan cang i atu June 12 chun ah Sagaing lei in SAC ralkap motor 16 a kai lio, tiah kan theih.“Atulio Thantlang Peng le Hakha Peng kahdohnak ah bawmtu ding in a rak ra mi an si lai, tiah ruah an si ko. Sangaing lei in aa thawh mi hi 10:30 AM hrawng ah Pale an phan i Kalaymyo lei ah maw an lanh lai, asiloah Gangaw lei in direct Hakha dah an kai lai, ti a fiang lo.

 


June 11 zaan zong ah Kalay in Hakha ah motor 6 a phan cang,” tiah min langhter lo mi pakhat nih The Hakha Times ah a chim.Nizaan naite, Hakha Peng kahdohnak ah SAC ralkap 10 an thi i Thantlang Peng Khualhring tlang kahdohnak zong ah SAC ralkap 17 an thi, tiah CDF nih a thanh.

Credit: The Hakha Times