Tuchun Hakha Le Thantlang Khuapi Ah Ralhrang An Cawlcangh Ning Cu An Lor Kho Ve Taktak

SAC mithat phu nih Hakha le Thantlang ah thil an fir, inn an boh.NUG nih September 7 i Myanmar ramhuap D-DAY a thanh hnu Hakha le Thantlang khuapi chung um khuami cheukhat hna cu an zaam i, SAC mithat phu nih khuami hna thilri an fir, inn tiang an boh tiah khuami hna sin in thawng kan theih.

Hi kong he pehtlai in Thantlang khuami pakhat nih, “Khuachung ah meithal le bomb thawng theih hnu in khuami a tam deuh cu Mizoram lei ah an zaam. Tawh rem tein an hrenh mi inn cheukhat cu SAC ralhraang nih an bouh i an thilri zei mawzat an laak. An fir bik mi cu inn zuat satil an si. Anmah nawl in an tlaih, an thah hna.

A taang mi kanmah nih le zei ti vun ti awk an that lo ca ah a zoh tu in kan zoh sawh ko hna. An fir mi le an laak mi hi a tam ngai cang,” tiah a chim. Thantlang khuapi chung lawng ah an laak mi hi vok le ar an si i, an riahnak hmun ah an duh poh in an thah, an ei. Keimah ka hmuhnak hmanh ah an vok le ar an thah mi hi 20-30 poh cu a si cang tiah a cunglei minung nih a chimchap.

Cun, Hakha khuapi chung ah SAC nih inn an bouh I thilri an fir mi a um tiah khuami sin in kan theih. Khuami pakhat nih, “Nihin September 17 Hakhathar Lungphun tlang ah bomb le meithal thawng kan theih. Thawng a daih dih hnu caan zeimaw zat ah inn pakhat an boh i a chung a ummi facang tun le ar 7 hrawng an laak kan hmuh.

Cun, mehhaang tamhmoih khachuan sen, khachuan raang zong tam ngai an fir,” tiah a chim.NUG nih D-Day a thanh hnu Hakha Thantlang khuapi chung ah nifatin zaan fatin in Bomb le meithal thawng theih peng a si. Bomb le meithal an duh poh in an puah, an kah ruang ah inn le lo a rawk mi a tam lawng si loin khuami hliam tuar zong an um cang.

Credit: The Hakha Post

Author: Salai Ephraim